के तपाई प्रायः लामो समयसम्म कुनै एक कार्यमा ध्यान दिन सक्नुहुन्न? के मन सधैं अशान्त हुन्छ? यस्ता समस्याबाट बच्न नियमित रूपमा योगासन गर्नाले फाइदा हुन्छ । हामी सबैलाई दैनिक कार्यहरू गर्नको लागि ध्यान र एकाग्रता चाहिन्छ, तर यदि तपाइँ लामो समयसम्म काममा एकाग्र हुन नसक्ने महसुस गर्नुहुन्छ भने, दिमाग बारम्बार भड्कन्छ । तपाईको यो बानीले तपाईको उत्पादकत्वलाई असर गर्न सक्छ ।
यदि तपाइँ एकाग्रता बढाउने उपायहरू खोज्दै हुनुहुन्छ भने, योग तपाइँको समस्याको समाधान हुन सक्छ । विभिन्न प्रकारका योग आसनहरूले तपाईंको दिमागलाई शान्त पार्न र एकाग्रता बढाउन मद्दत गर्न सक्छ । दिमागलाई शान्त राख्नाले कार्यशक्ति र उत्पादकता दुवै बढ्छ ।
आउनुहोस् जानौं यो समस्यामा कुन–कुन योगासन प्रभावकारी मानिन्छ?
वृक्षासन योग अभ्यास
वृक्षासन योग वा रूख मुद्रा एक शुरुआती स्तर हठ योग आसन हो । यस आसनमा शरीरको स्थिति रूखको आकारमा हुनुपर्छ । आदर्श रूपमा तपाईंले यो आसन बिहान खाली पेटमा गर्नुपर्छ । यो योग अभ्यास मन शान्त र एकाग्रता बढाउन लाभदायक हुन सक्छ । वृक्षासन योगले शरीरमा रक्तसञ्चारलाई व्यवस्थित राख्न पनि मद्दत गर्छ, जसले धेरै रोगको जोखिमलाई पनि कम गर्छ ।
पश्चिमोत्तनासन योग
पश्चिमोत्तनासन योगको अभ्यासले मस्तिष्कमा नयाँ ऊर्जाको संचारलाई बढाउन सहयोगी हुने विश्वास गरिन्छ । यो आसनले मेरुदण्डलाई तन्काउन, दिमागलाई शान्त पार्न र तनाव र हल्का डिप्रेसनबाट छुटकारा दिन मद्दत गर्छ । पश्चिमोत्तनासनको अभ्यासले चिडचिडापन र क्रोध जस्ता नकारात्मक भावनाहरूलाई कम गर्छ र तपाईंको शरीरलाई उर्जा दिन्छ। पेट र श्रोणि अंगहरूलाई मसाज गर्न र टोन गर्न यो एक उत्कृष्ट योग मुद्रा पनि हो । मनको एकाग्रता बढाउन यो योग नियमित अभ्यास गर्नुपर्छ ।
भ्रामरी प्राणायाम
कुनै पनि प्रकारको प्राणायाम मानसिक स्वास्थ्यको लागि विशेष लाभदायक मानिन्छ । भ्रामरी प्राणायामले तपाईंको स्मरणशक्ति र एकाग्रता दुवै सुधार गर्न मद्दत गर्छ । यसले तपाईंलाई क्रोध, निराशा र चिन्ताबाट तुरुन्तै राहत पाउन मद्दत गर्दछ । यस योगको अभ्यास गर्दा मौरी जस्तो आवाज आउँछ, यो योगलाई आत्मविश्वास बढाउन र रक्तचाप कम गर्न पनि सहयोगी मानिन्छ । यो योग दैनिक अभ्यास गर्नाले स्वास्थ्यमा धेरै फाइदा पुग्न सक्छ ।
अमरउजालाबाट भावानुवाद
