काठमाडौं—सरकारले कोभिड—१९ विरुद्ध सुरुदेखि नै गर्नुपर्ने आधारभूत कार्यहरु गर्दै आएको पूर्व स्वास्थ्यमन्त्री खगराज अधिकारीले बताएका छन् । हेल्थ आवाजसँग कुरा गर्दै उनले सरकारले गरेको राम्रा कामको आलोचना मात्रै भएको दावी गरे ।
‘विश्व नै आपतमा परेको बेलामा सरकारले औषधि, स्वास्थ्य सामाग्री जनशक्ति खटाउने, समयमै लकडाउन गर्नेदेखि विद्यार्थीको परीक्षासम्म रोक्यो । नत्र जनस्तरसम्म कोरोना फैलने थियो । यस्तो विश्व नै समस्यामा परेको बेलामा सरकारका यी कार्यलाई देखिएन,’ उनले भने ।
अधिकारीले पिसिआर परीक्षणमा पनि सरकारले खर्च गरिरहेको बताए । उनले पिसिआर परीक्षण सरकारले बाहिरबाट आउने मानिस, स्वास्थ्यकर्मी र इमर्जेन्सीका बिरामीहरुको पिसिआर गरिरहेको बताए । ‘पिसिआरको दायरा पनि बढाइएको छ । यसको साथै अन्य तयारीमा पनि सरकार लागिरहेका छ’ ,उनले थपे, ‘सकारात्मक कार्यलाई प्रोत्साहन नगर्दा बिरामीको उपचारमा ड़ाइपर लगाएर दिशा, पिसाब रोकेर घन्टौ खटिएका स्वास्थ्यकर्मी र सुरक्षाकर्मीमाथि समेत अन्याय हुन्छ । उनीहरु पनि सरकार नै हुन् ।’
यसको साथै उनले हाल अस्पतालमा भेन्टिलेटरहरुको व्यवस्था गर्नुपर्ने, स्थानीय तहमा अस्पताल थप्ने, ’कन्ट्याक ट्रेसिङ’ जस्ता चुनौतीहरु देखिएको बताए। यी कुराहरुमा सरकार संचेत रहेको र तयारीमा सरकार लाग्ने उनले अभिव्यक्ति दिए। स्वास्थ्य मन्त्रालयले गरेको कामको आलोचना गर्नु भन्दा सकारात्मक कार्यलाई प्रोत्सहान दिएर मनोबल बढाउँनु पर्ने उनले बताए।
हेर्नुहोस् भिडियोमा पूर्व स्वास्थ्यमन्त्री खगराज अधिकारीसँग गरिएको कुराकानीः
