धनगढी—सुदूरपश्चिमको राजधानी गोदावरी नगरपालिकाका स्थानीय, आधारभूत स्वास्थ्य सेवाका लागि पनि परनिर्भर भएका छन् । स्वास्थ्यको अधिकार स्थानीय तहमा गएको दुई वर्ष भइसक्दा समेत प्रदेशको राजधानीकै बासिन्दाले आधारभूतस्तरको स्वास्थ्य सेवाका लागि समेत परनिर्भर हुनुपर्ने बाध्यता रहेको हो ।
स्थानीय तहलाई १५ शैय्यासम्मको अस्पताल सञ्चालन गर्ने अधिकारसँगै आधाभूत स्वास्थ्य सेवाको जिम्मेवारी दिइएको छ तर १२ वडा रहेको नगरपालिकामा जम्मा १० स्वास्थ्य संस्था छन् ।
साविककै १५ शैय्याको मालाखेती अस्पताल रहेको छ भने नगरभित्रै चार वटा स्वास्थ्य चौकी वेलादेवीपुर, वडेहा, गेटा र गोदावरीकै ओलानीमा रहेका छन् । पाँच वटा सहरी स्वास्थ्य क्लिनिक जमुनाभाडी, हाटखोली, फुलवस्ती, चाप्सली र खमौरामा छन् । तर वेलादेवीपुर स्वास्थ्यचौकीमा हालसम्म वर्थिङ सेन्टर स्थापना हुन नसकेको नगरपालिकाका स्वास्थ्य संयोजक वीरबहादुर कुँवरले बताए । ‘स्वास्थ्य संस्थाले निःशुल्क प्रदान गर्ने औषधीको पनि कमी छ,’ कुँवरले भने, ‘कर्मचारीको पनि उचित व्यवस्थापन हुन सकेको छैन्, कतै कम त कतै बढी कर्मचारी छन् ।’
प्रदेशकै राजधानी तोकिएको गोदावरीमा १५ शैय्याको सरकारी अस्पताल सञ्चालनमा रहेको छ । विगतमा गाउँ विकास समितिले नै सञ्चालन गरेको मालाखेती अस्पताल अहिले नगरपालिका मातहत आएको छ । तर, पनि अपेक्षाकृत रुपमा सेवा सुधार हुन सकेको छैन् । १५ शैय्याको अस्पताल भएर पनि विगतमा आकस्मिक सेवा दिन नसकेको मालाखेती अस्पतालमा २४ घण्टा आकस्मिक सेवा सञ्चालन गरेको दावी नगरपालिका मेयर हरिसिंह साउँदको छ । तर, प्रसुतीको शल्यक्रिया सेवाकै लागि डाक्टर र अत्याधुनिक उपकरणको आवश्यकता छ ।
तर, नगरपालिकाले त्यसका लागि पहल नगरेको देखिएको छ । सुदूरपश्चिमका सात पहाडी जिल्लाको प्रवेशद्धार समेत रहेको गोदावरीमा दुर्घटनाका घाइते प्राथमिक स्वास्थ्य सेवा लिन अत्तरिया पुग्ने गर्छन् । तर, मालाखेती अस्पतालमा हाडजोर्नी सेवा नहुँदा समस्या हुने गरेको छ । यता अधिकार सम्पन्न नगरपालिकाले भने सेवा सुधार गर्दै विस्तार गर्नतर्फ ध्यान दिएको छैन् । चालु आर्थिक वर्षमा औषधी खरिद गर्नको लागि २० लाख बजेट विनियोजन गरिएको छ । जसमा पाँच लाखको औषधी खरिद गरिसकेको नगरपालिकाले जनाएको छ ।
