कैलाली—सुदूरपश्चिम्मको अस्थायी राजधानी धनगढीमा प्रादेशिक जनस्वास्थ्य प्रयोगशाला स्थापना गरिएपनि सेवा सुचारु भने हुन सकेको छैन् । संघीय सरकारले ७ वटै प्रदेशमा प्रादेशिक जनस्वास्थ्य प्रयोगशाला सञ्चालनमा ल्याउन २०७४ सालमै दरबन्दी स्वीकृत गरेको थियो ।
जसअन्र्तगत सुदूरपश्चिममा पनि ११ जनाको दरबन्दी स्वीकृत गर्दै एकजना प्रयोगशाला अधिकृत र एकजना लेखापाललाई प्रादेशिक प्रयोगशालामा खटाएर कार्यालय खोलिएको छ । सुरुमा भवन खोज्नमा ढिलाइ गरिएपनि भाडामा भवन लिएर प्रयोगशाला स्थापना गरेको तीन महिना भैसकेको छ तर अहिलेसम्म प्रशासनिक काम मात्रै भैरहेको छ ।
भाडामा भवन लिएर कर्मचारी व्यवस्थापन भएपनि अहिलेसम्म प्रशासनिक गतिविधि मात्रै अगाडि बढाइएको प्रादेशिक प्रयोगशालाकी प्रयोगशाला अधिकृत अस्मिता सापकोटाले बताइन् । उनले बजेट माग गरिएकाले निकाशा भएलगत्तै सेवा सुचारु गरिने जनाइन् ।
विशेष प्रकृतिका जाँचमा सहजता हुने उद्देश्यले स्थापना गरिएको प्रादेशिक जनस्वास्थ्य प्रयोगशालाले अहिले प्रयोगशला सञ्चालकलाई सामान्य तालिम उपलब्ध गराउने कार्य अगाडि बढाएको उनले बताइन् । गत वर्ष प्रदेश सरकारले प्रादेशिक प्रयोगशाला स्थापनाका लागि ३० लाख बजेट बिनियोजन गरेको थियो ।
चालु वर्षमा मन्त्रालयसँग प्रयोगशलाले पुँजीगत खर्चतर्फ तीन करोड २३ लाख माग गरिएको छ । माग भएको दुई महिनासम्म बजेट भने पाएको छैन् । तर, प्रयोगशालाका लागि आपूर्ति केन्द्रलाई बजेट पठाइएको सामाजिक विकास मन्त्रालयका वरिष्ठ जनस्वास्थ्य अधिकृत नरेन्द्र कार्कीले बताए ।
उनले आपूर्ति केन्द्रसँग समन्वय गर्न परिपत्रसमेत गरिएको जानकारी दिए । झण्डै साढे तीन वर्षको पहलपछि २०७४ सालको कात्तिकदेखि सेती अस्पतालमा क्षेत्रीय प्रयोगशालाको नाम दिएर सञ्चालन गरिएको थियो । तर, नाम क्षेत्रीय प्रयोगशाला भएपनि अस्पतालले आफ्नै प्रयोगशाला मात्रै सञ्चालन गरेको थियो ।
यस वर्ष आफ्नै भवन लिएपनि सेवा सुचारु नहुँदा अहिले सानोतिनो जाँचका लागि पनि परनिर्भर हुनुपर्ने बाध्यता रहेको छ । प्रयोगशालामा आवश्यक उपकरण खरिदको प्रक्रियासमेत अगाडी बढेको छैन् ।
