धनगढी—कैलालीस्थित गेटा अस्पताल ६ माघदेखि नेतृत्वबिहीन छ । स्वास्थ्य तथा जनसंख्या मन्त्रालयले गत कार्तिक अन्तिम साता गेटा अस्पतालको निर्देशकमा डा. अशोक श्रीपाईलीलाई नियुक्त गरेको थियो ।
तर, डा. श्रीपाईलीले ६ माघमा आफू गेटा अस्पतालको निर्देशकको जिम्मेवारी नरहने भन्दैं हेरफेर गर्न मन्त्रालयमा निवेदन दिएका थिए । स्वास्थ्य तथा जनसंख्या मन्त्रालयले डा. श्रीपाईलीको दरबन्दीमै रहने गरी काज फिर्ता गरेको छ ।
डा. श्रीपाईली आफू दरबन्दरी रहेको भेरी अस्पतालमै फर्किसकेका छन् । तर, झण्डै दुई महिना बित्नै लाग्दा समेत स्वास्थ्य तथा जनसंख्या मन्त्रालयले गेटा अस्पतालको निर्देशकको जिम्मेवारी हालसम्म पनि कसैलाई प्रदान गरेको छैन ।
गेटा अस्पतालमा कार्यरत कर्मचारीहरुले गत माघबाट तलब पाएका छैनन् ।
स्वास्थ्य तथा जनसंख्या मन्त्रालयका प्रवक्ता डा. प्रकाश बुढाथोकीले डा. श्रीपाईलीको काज फिर्ता भएको र नयाँ जिम्मेवारीको विषयमा हालसम्म कुनै निर्णय नभएको बताए । बजेट कार्यान्वयनको समयमा अस्पतालको जिम्मेवारी हेरफेरले बजेट कार्यान्वयनमा समेत समस्या ल्याएको छ ।
अस्पतालका लागि चालु आर्थिक वर्षमा चालुसँगै पुजीगत खर्च गरी ५३ करोड रुपैयाँ बजेट बिनियोजन गरिएको छ । पूर्ण रुपमा अस्पताल सञ्चालन गर्न स्वास्थ्य उपकरणसँगै अन्य तयारी आवश्यक परेका बेला अस्पताललाई भने गत माघबाट नेतृत्वबिहीन बनाइएको छ ।
