धनगढी—सुदूरपश्चिम प्रदेशको दार्चुला जिल्लाको अपी हिमाल गाउँपालिकाले पर्यटनलाई नै स्वास्थ्य सेवा सँग जोडिरहेको छ । अपी हिमाल गाउँपालिकाले आर्थिक वर्ष २०८१/८२ को नीति तथा कार्यक्रममै आवधिक रुपमा स्थानीयस्तरमा विभिन्न रोग सम्बन्धी विशेषज्ञ चिकित्सकसँगै हेल्थ टुरिज्मसहित स्वास्थ्य शिविर संचालन गरिने व्यवस्था गरेको छ ।
सोही नीति तथा कार्यक्रमअन्तर्गत अपी हिमाल गाउँपालिकाले २ र २ कात्तिकमा निःशुल्क आँखा शिविरको आयोजना गरेको छ । उक्त शिविर भिजन टुगेदर नेपाल र गाउँपालिकाको संयुक्त आयोजना तथा रोज च्यारीटी, दृष्टि आई फाउन्डेशन, हिमालय आई प्रोजेक्टको सहयोगमा खण्डेश्वरी स्वास्थ्य चौकीमा निःशुल्क शल्यक्रिया शिविर सम्पन्न गरेको छ ।
शिविरबाट छनोट भएका मोतिबिन्दुका बिरामीलाई निःशुल्क शल्यक्रियासमेत गरिएको छ । दुई दिने निःशुल्क मोतियाबिन्दु शल्यक्रिया शिविरबाट १ सय १६ जना लाभान्वित भएका छन् । शिविरबाट ३५ जना मोतिबिन्दुका बिरामीको शल्यक्रिया गरेको अपी हिमाल गाउँपालिकालको स्वास्थ्य शाखाले जनाएको छ ।
अपी हिमाल गाउँपालिकामा घुम्न तथा स्वास्थ्य शिविर संचालन गर्न आउने पर्यटकहरुलाई गाउँपालिका भित्रको यातायात सुविधा, बस्ने, घुम्ने ब्यवस्था गाउँपालिकाले गर्ने गरेको छ । विशेषज्ञ स्वास्थ्य शिविर आयोजना गर्न सुदूरपश्चिम प्रदेशको धनगढी तथा अत्तरियाबाटै यातायातको ब्यवस्था गाउँपालिकाले गरेको पालिकाका स्वास्थ्य शाखा संयोजक राजेन्द्र धामीले बताए । ‘अपी हिमाल बेस क्याम्प घुमाउनुका साथै खाना बस्नसमेत ब्यवस्था गरिरहेका छौं,’ उनले भने ।
सो आँखाको शल्यक्रिया शिविरभन्दा अघि सिपी अस्पताल धनगढी र नेपाल फार्मेसी संघको आयोजनामा जनरल स्वास्थ्य शिविर संचालन गरिसकेको गाउँपालिकाले जनाएको छ ।