धनगढी—सेती प्रादेशिक अस्पतालले सिकलसेल एनिमिया तथा थालेसेमिया सम्बन्धी समुदायस्तरमा स्क्रिनिङ तथा अनुसन्धानका लागि गरएिको निःशुल्क स्वास्थ्य शिविरमा परीक्षण गरेका नमुनामा सिकलसेल एनिमिया ‘बाहक’ पाइएको छ । कैलालीको धनगढी उपमहानगरपालिका—१६ को घसिटा र वडा नं १७ को धुर्जन्नामा करिब ३ सय ५१ जनामा गरिएको परीक्षणमा ६० जनामा सिकलसेल देखिएको सेती प्रादेशिक अस्पतालका सामाजिक सेवा इकाई प्रमुख गौरीदत्त जोशीले बताए ।
धनगढी उपमहानगरपालिका—१६ को घसिटामा १ सय ३४ महिला र ३० पुरुषमा गरिएको परीक्षणमा २४ महिला र ६ जना पुरुषमा सिकलसेल देखिएको छ । वडा नं १७ को धुर्जन्नामा १ सय ३७ महिला र ५० जना पुरुषमा गरिएको परीक्षणमा २३ महिला र ७ पुरुषमा सिकलसेल देखिएको अस्पतालले जनाएको छ ।
समुदायमा गरिएको परीक्षणमा सिकलसेल बाहक (sickling) देखिएपछि उक्त नमुना इलेक्ट्रोफोसिस गरेर सिकलसेल, थालसेमिया वा अन्य छुट्याइने सामाजिक इकाई प्रमुख जोशीले बताए । ‘सिकलसेल देखिएपछि सरकारले प्रदान गर्दै आएको सेवामार्फत उपचार गर्दै आएका छौं,’ उनले भने ।
समुदायमा सचेतना बढ्दैं
धनगढी उपमहानगरपालिका—१७ धुर्जन्ना उत्तर खैरेनी टोलका भलमन्सा सियाराम चौधरी आफ्नो समुदायका मान्छेसँगै सिकलसेल परीक्षण गराउन शिविरसम्म आइपुगेका थिए ।
सिकलसेल एनिमिया तथा थालेसेमियाको समुदायस्तरमा जानकारीबारे हेल्थआवाजको प्रश्नमा भलमन्सा चौधरीले उक्त रोगबारे समुदायका मान्छे त्यति जानकार नभएकाले स्वास्थ्य संस्था तथा चिकित्सकले गराएको जानकारी समुदायसम्म पु¥याउने गरेको बताए ।
त्यसैगरी, धनगढी उपमहानगरपालिका—१७ की २५ वर्षीय आशा चौधरी सिकलसेल परीक्षणका लागि शिविरमा आएकी थिइन् । हातखुट्टा दुख्ने समस्या भएकाले भलमन्साले खबर गरेपछि परीक्षणको लागि आएको उनले बताइन् । ‘मामालाई सिकलसेल एनिमिया देखिएकाले मैले पनि परीक्षण गराएको छु,’ उनले भनिन् ।
विगत ६ वर्षदेखि स्वास्थ्य स्वयंसेविका रुपमा काम गरिरहेकी करुणा चौधरीले समुदायमा सिकलसेल एनिमिया सम्बन्धी जनचेतना जगाउने काम गरिरहेको बताइन् । ‘सिकलसेल एनिमिया तथा थालेसेमिया सम्बन्धी तालिम लिएका छौं,’ करुणा भन्छिन्, ‘लक्षण देखिएका तथा आफन्तमा सिकलसेल देखिएकालाई रगत परीक्षणको लागि स्वास्थ्य संस्था पठाउने गरेका छौं ।’
