धनगढी—राजधानी काठमाडौंभन्दा बाहिर पहिलो पटक सेती प्रादेशिक अस्पतालमा माइक्रोबायोलोजी प्रयोगशाला स्थापना भएको छ । आइतबार विभिन्न दातृ निकायको सहयोगमा प्रयोगशाला स्थापना गरिएको प्रयोगशालाको उद्घाटन गरिएको हो ।
उद्घाटनपछि नवनिर्मित प्रयोगशाला सेती प्रादेशिक अस्पताललाई हस्तान्तरण गरिएको छ । एक कार्यक्रमकाबीच दातृ निकायका प्रतिनिधिसहितको उपस्थितीमा जीएनआई नेपालकी कन्ट्री डाइरेक्टर जाइ कौन राहो र सेती प्रादेशिक अस्पतालका प्रमुख मेडिकल सुपरिटेन्डेन्ट हेमराज पाण्डेले संयुक्त रुपमा उद्घाटन गरेका थिए ।
सेति प्रादेशिक अस्पतलमा रहेको भवनको जिर्णेदार गरी प्रयोगशाला स्थापना गर्नको लागि कोइका, इन्टरनेशनल भ्याक्सिन इन्स्टिच्युट, ग्लोबल डिजिज इरेडिकेसन फण्ड, गुड नाइबर इन्टरनेशनल, फाया नेपाललगायतका दातृ निकायले सहयोग गरेका छन् ।
उक्त प्रयोगशालाको उपकरणको लागि युके एड, फेलमिङ फण्ड, मोटो म्याकडोनाल्ड, एफएचआई३६० ले सहयोग गरेका छन् । सेती प्रादेशिक अस्पतालमा स्थापना गरिएको उक्त माइक्रोबायोलोजी प्रयोगशालामा सबै माइक्रोबायोलोजी परीक्षणको लागि कल्चर गरिने अस्पताल प्रयोगशाला विभाग प्रमुख रमेश शाहीले बताए । आईभीआई परियोजनामार्फत २ जना दक्ष जनशक्तिसमेत प्रयोगशालालाई प्रदान गरिएको छ ।
