नेपालगञ्ज मेडिकल कलेजको बस दुर्घटना हुँदा २ जना विशेषज्ञ चिकित्सकसहित ७ जना घाइते

धनगढी—दार्चुलाको गोकुलेश्वर अस्पतालमा हुने शल्यक्रिया शिविरमा जाँदै गरेको नेपालगञ्ज मेडिकल कलेज कोहलपुर शिक्षण अस्पतालको बस दुर्घटनामा परेको हो । सोमबार राति दशरथचन्द राजमार्गअन्तर्गत बैतडीको पाटन नगरलालिका–८ अनारखोलीमा बस दुर्घटना हुँदा २ जना विशेषज्ञसहित ७ जना घाइते भएका छन् ।

प्रहरीकाअनुसार राति १० बजे भे १ क ३१८ नम्बरको उक्त बस अनारखोलीको तल्लो मोडमा दुर्घटनामा परेको हो । बसमा १७ जना सवार रहेकोमा ७ जना घाइते भएको नेपालगञ्ज मेडिकल कलेज स्वास्थ्य शिविर संयोजक अब्दुल हुसेन खानले बताए ।

उनका अनुसार स्त्री रोग विशेषज्ञसहित २ जना चिकित्सक, ३ जना नर्सिङ स्टाफसहित अन्य कर्मचारी घाइते भएका छन्। घाइते २ जना कोहलपुर नै रिफर गर्ने खानले बताए ।

सुदूरपश्चिम प्रदेशको स्वास्थ्य निर्देशनालय दिपालयको आयोजनामा गोकुलेश्वर अस्पतालमा महिलाको पाठेघर खस्ने समस्याको शल्यक्रिया स्वास्थ्य शिविर आयोजना गरेको थियो ।