धनगढी—सुदूरपश्चिम प्रदेशका सात जिल्लाको रेफरल अस्पतालको रुपमा रहेको डडेल्धुरा अस्पताललाई मेडिकल कलेज बनाउने सुरसार सुरु भएको छ । मन्त्रिपरिषद् बैठकले डडेल्धुरामा मेडिकल कलेज स्थापना गर्ने सैद्धान्तिक सहमति प्रदान गरेसँगै सुरसार सुरु भएको हो ।
तत्कालीन टिम अस्पताल र जिल्ला अस्पताल डडेल्धुरालाई समायोजन गरेर उपक्षेत्रीय अस्पताल बनाइएको थियो । आर्थिक वर्ष २०७६/०७७ मा विशेषज्ञ सेवासहित संघीय सरकार मातहत रहने गरी डडेल्धुरा अस्पताल स्तरोन्नती गरिएको थियो । एक सय शैय्याको साविकको उपक्षेत्रीय अस्पताललाई आधुनिक सेवा र विशेषज्ञ डाक्टरसहितको पाँच सय शैय्याको अस्पतालमा स्तरोन्नती गरिएको थियो ।
डडेल्धुरा अस्पतालको मातहतमा हाल १ सय ५३ रोपनी जग्गा रहेको छ र साथै अस्पतालमा अहिले १ सय शैय्याको अस्पताल भवन, चिकित्सक तथा नर्सिङ आवास गृह निर्माणाधीन अवस्थामा छन् ।
स्वास्थ्य मन्त्रालयको प्रस्तावमा सोमबार बसेको क्याबिनेट बैठकले डडेल्धुरा अस्पताललाई मेडिकल कलेज बनाउने प्रस्तावमा सैद्धान्तिक सहमति प्रदान गरेको हो ।
दरबन्दीअनुसार कर्मचारी नै छैनन्
डडेल्धुरा अस्पतालमा दरबन्दी अनुसारको विशेषज्ञ चिकित्सकको दरबन्दी अझै पदपूर्ति भएको छैन । ११ औं तहको मेडिकल सुपरिटेडेन्ट हुनुपर्नेमा ८ औं तहको डा. चेतराज भट्टलाई निमित्त मे.सु.को जिम्मेवारी दिइएको छ । डा. भट्टभन्दा पहिले पनि ८ औं तहको चिकित्सकलाई नि.मे सु को जिम्मेवारी दिइएको थियो ।
प्रधानमन्त्री शेरबहादुर देउवाको गृहजिल्लासमेत रहेको डडेल्धुरा अस्पतालमा उपकरण ब्यवस्थापन तथा भौतिक पूर्वाधार निर्माणाधीन अवस्थामा रहेको भएतापनि कर्मचारी अभावका कारणले अस्पतालले उद्देश्यअनुरुप सेवा विस्तार गर्न सकेको छैन ।
डडेल्धुरा अस्पताल प्रशासनले पाँच सय बेड वा सोभन्दा बढी शैय्याको अस्पताल सञ्चालनको लागि ठूलो संख्यामा थप नयाँ दरबन्दी स्वीकृतीका लागि स्वास्थ्य मन्त्रालयमा अनुरोध गरेको थियो । डडेल्धुरा अस्पताललाई मेडिकल कलेज बनाउने कुरा सकारात्मक रहेको अस्पताल विकास समितिका अध्यक्ष करुणाकर ओझाले बताए । उनले भने, ‘अस्पताल संचालनको लागि ओएमएन सर्भे गरेर थप कर्मचारी माग गर्दै स्वास्थ्य तथा जनसंख्या मन्त्रालयलाई अनुरोध गरिएको छ ।’
सुदूरपश्चिम प्रदेशमा २ मेडिकल कलेज ?
चिकित्सा शिक्षा सुधारको आन्दोलनमा लागेका डा. गोविन्द केसीले सबै प्रदेशमा मेडिकल कलेज स्थापनालगायतका माग राखेर लामो समयदेखि आन्दोलनरत छन् ।
डडेल्धुरा अस्पताललाई मेडिकल बनाउन मन्त्रिपरिषद्ले सैद्धान्तिक सहमति दिएको छ । तर, सुदूरपश्चिम प्रदेशकै कैलालीमा निर्माण अन्तिम चरणमा पुगेको गेटा मेडिकल कलेज अझै संचालनमा आउन सकेको छैन । गेटा मेडिकल कलेज ८५ प्रतिशत भौतिक पूर्वाधार निर्माण कार्य सम्पन्न भएको छ तर कानुन अभावका कारण हालसम्म पनि संचालनमा आउन सकेको छैन ।
वि.सं. २०७५ मा शिक्षा, विज्ञान तथा प्रविधि मन्त्रालयले गेटा मेडिकल कलेज संचालनको लागि विधेयक प्रतिनिधिसभामा पठाउन मन्त्रिपरिषद्मा पठाएको तर उक्त विधेयक फिर्ता आएको थियो । पुनः शिक्षा मन्त्रालयले विधेयकको मस्यौदा संशोधन गर्दै मन्त्रिपरिषद्मा पठाएको छ । मन्त्रिपरिषद्ले विधेयकलाई प्रतिनिधि सभामा लगेको छैन ।
