धनगढी–सेती प्रादेशिक अस्पतालमा कोभिड–१९ संक्रमित युवकको उपचार तथा निगरानीमा खटिने स्वास्थ्यकर्मीको पनि नमूना परिक्षण गर्ने तयारी गरेको हो ।
अस्पतालका प्रवक्ता डा. जगदिशप्रसाद जोशीले संक्रमित युवकको सम्पर्कमा रहेका सबै चिकित्सक तथा स्वास्थ्यकर्मीको थ्रोट स्वाबको नमूना संकलन गरी परीक्षणका लागि काठमाडौं पठाउने तयारी भइरहेको बताए ।
स्वास्थ्यकर्मीहरुले पर्सनल प्रोटेक्टिभ इक्वीपमेन्ट (पीपीई) लगायतका व्यक्तिगत सुरक्षाका समाग्री बिना युवकको नमूना संकलन गरेकाले उनीहरुको पनि स्वाब परिक्षण गर्न लागिएको बताए ।
परिक्षणका पठाइएका ७ जनाको रिपोर्ट नेगेटिभ
सेती प्रादेशिक अस्पतालमा कोभिड–१९ को आशंकामा भर्ना भएका ७ जनाको रिपोर्ट नेगेटिभ आएको छ । कोभिड १९ को आशंकामा अस्पतालको आईसोलेसन वार्डमा भर्ना भएपछि धनगढीका संक्रमित युवकको नमूनासँगै उनीहरुको थ्रोट स्वाब संकलन गरी पठाइएकोमा रिपोर्ट नेगेटिभ आएको हो ।
सेती प्रादेशिक अस्पतालको इमर्जेन्सी विभाग प्रमुखसमेत रहेका प्रवक्ता डा. जोशीले उनीहरुको नमूना नेगेटिभ आएको जानकारी दिए । नमूना संकलन गरी परिक्षणका लागि काठमाडौं पठाइएकामध्ये दुईजनाको रिपोर्ट आउन बाँकी छ ।
