एक वर्षअघि एक रात सिरहाका युवा दिलिपकुमार यादवलाई कस्मेटिकमा ब्राण्डेण्ड प्रडक्टहरु व्यापार गर्ने आइडिया फुर्यो । सहरमा उनले ब्राण्ड बिनाका नक्कली प्रडक्टहरु थुप्रै नाफा खाएर बेचिरहेको भेटेका थिए । यसले एक त ग्राहकको टन्न पैसा खर्च हुने अर्कोतर्फ उनीहरुले ब्राण्डका कस्मेटिकहरु पनि प्रयोग गर्न नपाउने अवस्था थियो । यस्तो अवस्थामा बदल्न केही गर्ने जोश उनमा आयो ।
उनले कोरियन ब्राण्डका उच्च गुणस्तरका स्कीन प्रडक्टहरु ल्याएर नेपालमा बेच्ने योजना बनाए । २७ वर्षीय दिलीपले भोलिपल्ट नै त्यो योजनामा काम गर्न सुरु गरे । ‘ओभरनाइट डिसिजनमा सुरु भएको कम्पनी हो,’ दिलीप भन्छन् ।
‘मार्केटमा एकदमैं फेक प्रडक्टहरु आइरहेका थिए,’ ड्रिम स्कीन नेपालका प्रबन्ध निर्देशक दिलिप भन्छन्, ‘ग्राहकले पैसा तिरिरहेको छ भने अथेन्टीक प्रडक्ट पाउनु उसको अधिकार हो । यसले मानिसको अनुहारमा पनि असर गरिरहेको पाए । त्यो ग्याप मार्केटमा देखे ।’ त्यही ग्याप पूरा गर्ने लक्ष्यका पाँच लाख लगानीमा ‘ड्रिम स्कीन नेपाल’ सुरु गरे ।
स्कीनमा कोरियन ब्राण्डहरु सर्च गरे, कोरिया नै पुगेर विभिन्न स्कीन प्रडक्ट कम्पनीहरुसँग सहकार्य अगाडि बढाए । मध्यबानेश्वरमा ड्रिम स्कीन नेपालको स्टोर पाँच कर्मचारीबाट सुरु भयो । ड्रिम स्कीन नेपाल पाँच ब्राण्डका १० प्रडक्टरबाट सुरु भयो । कम्पनी विस्तारै रफ्तार लिदैं गयो । बजारमा रफ्तार लिन थालेसँगै ब्राण्डहरु पनि थपिदैं गए ।
मध्यबानेश्वरमा सुरु भएको ड्रिम स्कीन नेपालले एक वर्ष नबित्दैं लाजिम्पाटमा दोस्रो आउटलेट विस्तार गरेको छ । ‘एक वर्षको यात्रा उत्साहजनक रह्यो । हामीले आफूले सक्दो गरिरहेका छौं । नेपालभर नै हाम्रो प्रडक्टहरु जान थालेको छ,’ यादव भन्छन्, ‘यसले ग्राहकहरुको छाला स्वास्थ्यमा टेवा पुर्याउन पनि सहयोगी भूमिका खेलेको छ ।’
ड्रिम स्कीन नेपाल अहिले ६० ब्राण्डका ३६५ प्रडक्ट बजारमा बिक्री गरिरहेको छ । तीन चार ब्राण्डको नेपालको आधिकारिता विक्रेताका रुपमा पनि कम्पनीले काम गरिरहेको छ । ५ लाखबाट सुरु भएको कम्पनीको यात्रा एक वर्षमै ५० लाख रुपैयाँ हाराहारीमा पुगेको छ भने एक दर्जन मानिसले रोजगारी पाएका छन् ।
बजार विस्तारमा राम्रो प्रगति हासिल गरेपछि ड्रिम स्कीन नेपालका युवा संस्थापकहरु आउटलेट विस्तारमा केन्द्रीत हुन थालेका छन् । ‘एक्सान्स हाम्रो भविष्यको मुख्य लक्ष्य हो,’ दिलीप भन्छन्, ‘हामी धेरै स्टोरहरु खोल्ने योजनामा छौं ।’ उनकाअनुसार धेरै ठाउँमा ड्रिम स्कीन नेपालको स्टोर र प्रडक्टहरु पुर्याउन सकेमा त्यसले ब्राण्डेड प्रडक्टहरुमा आम मानिसको पहुँचलाई सहज बनाउनेछ ।
