काठमाडौं—जावलाखेलस्थित अल्का अस्पतालका मालिकहरुबीचको विवाद कम्पनी रजिष्ट्रारको कार्यलयमा पुगेको छ । साउन पहिलो साता अल्काका अल्पमत सेयरधनी तथा बोर्ड अफ डाइरेक्टर रहेका व्यवसायी क्या. रामेश्वर थापाले बराबरी सेयर र संचालक समितिमा समान प्रतिनिधित्व बनाइदिनुपर्ने माग गर्दै कम्पनी रजिष्ट्रारको कार्यलयमा उजुरी दिएका छन् ।
कम्पनी रजिष्ट्रार कार्यलयका उपसचिव टोपबहादुर विष्टले अल्का हस्पिटलको सेयरधनीमध्येको एक पक्षले सेयर बराबर गरीपाउँ भनेर उजुरी दिएको पुष्टि गरे । ‘अल्काको एक लगानीकर्ता एस.एस.जी. इन्भेष्टमेन्ट (क्या. रामेश्वरको कम्पनी)का संचालककर्ताले हाम्रो सेयर बराबर गरी पाउँ भन्दैं माग दावी गर्दै उजुरी दिएको छ,’ उनले भने, ‘हाम्रो काम सेयर बराबरी गर्ने होइन् । सेयरबारे निर्णय गर्ने त साधारणसभाले हो ।’ उपसचिव विष्टकाअनुसार एस.एस.जी. इन्भेष्टमेन्टले उजुरीमा बराबरी सेयरसँगै संचालक समितिमा पनि समान प्रतिनिधित्व माग गरेको छ ।
तर, अल्काका अध्यक्ष समेत रहेका बहुमत सेयरधनी कुमार थापा (तिलकबहादुर पुवँर थापा)ले भने कम्पनी रजिष्ट्रारको कार्यलय पुगेर सेयर र संचालक समितिका विषयमा सेयरधनीहरुकोे साधारणसभाले निर्णय गर्ने जवाफ दिएका छन् । ‘संचालक कति बनाउने भन्ने कुरा कम्पनीको सेयरधनीको साधारणसभाको निर्णयबाट हुने हो, कम्पनी रजिष्ट्रारको कार्यलयले यति बनाइ दे उति बनाइदे भनेर कसरी भन्न सक्छ ? त्यो त शेयरधनीहरुको अधिकारको कुरा हो,’ कुमारले कम्पनी रजिष्ट्रार कार्यलयका अधिकारीहरुसँग भनेका छन् ।
कुनै पनि कम्पनीको संचालक समितिमा बराबर प्रतिनिधित्व हुँदा त्यसमा निर्णय गर्न गाह्रो हुने र संस्था संचालनमा अवरोध सिर्जना हुने सम्भावना रहने कम्पनी रजिष्ट्रार कार्यलयका अधिकारीहरु बताउँछन् । अल्कामा अहिले कुमारको १४ लाख ९५ हजार ३ सय ६४ कित्ता सेयर रहेको छ भने रामेश्वरको त्यसभन्दा एक कित्ता कम सेयर छ ।
उजुरी परेपछि बिहीबार कम्पनी रजिष्ट्रारको कार्यलयले छलफलका लागि दुवै पक्षलाई बोलाएको थियो । तर, रामेश्वर थापाका प्रतिनिधिहरु उक्त छलफलमा समेत उपस्थित भएनन् । एक पक्ष उपस्थित नभएपछि उक्त उजुरीबारेमा केही निर्णय हुन नसकेको उपसचिव विष्टले हेल्थआवाजलाई बताए ।
यस विषयमा अल्का अध्यक्ष तथा संस्थापक कुमार थापासँग बुझ्दा उनले सेयर पार्टनर एस.एस.जी इन्भेष्टमेन्टको कुनै असन्तुष्टि नरहेको बताए । ‘असन्तुष्टि केही पनि देखिदैंन्, असारसम्म उहाँहरुकै सिए, इन्टरनल, एक्स्ट्रनल अडिटर र कन्सल्ट्यान्टहरु पनि हुनुहुन्थ्यो,’ कुमारले भने, ‘तर, कम्पनी रजिष्ट्रारमा उजुरी दिनुभएछ । आज छलफलका लागि बोलाएको थियो । हामी गयौं तर उहाँहरु नै आउनुभएन् ।’
वि.सं. २०५१ सालमा कुमार थापाले छोरीको नाममा अल्का फार्मेसी सुरु गरेका थिए । त्यही फार्मेसीलाई उनले वि.सं. २०५९ सालमा अल्का पोलिक्लिनिक बनाए । वि.सं. २०६२ सालमा त्यही पोलिक्लिनिकलाई अल्का हस्पिटल बनाएका हुन् । अहिले अल्का अस्पताल १०० शैय्याको अस्पताल हो ।
काठमाडौं चलेका प्राइभेट हस्पिटलमा पर्ने अल्कामा १ सय ५० जना चिकित्सकसहित ७ सय ५० जना कर्मचारी कार्यरत छन् । अस्पतालमा दैनिक ओपीडीमा ४०० देखि ६०० सम्म बिरामी हुने गरेको थापाले जानकारी दिए ।
कहिले भित्रिए रामेश्वर ?
अल्का व्यवस्थापन र रामेश्वर थापाबीच वि.सं. २०७६ साउनमा अस्पतालको सेयर किनबेच सम्बन्धी सम्झौता भएको थियो । तर, रामेश्वरले त्यसको दुई वर्षपछि मात्रै आफूहरुलाई सेयरवापतको रकम दिएको कुमार बताउँछन् ।
‘वि.सं. २०७६ मा सेयर किनबेच सम्बन्धी सम्झौता भएको हो,’ उनले भने, ‘तर, उहाँले वि.सं. २०७८ सालमा मात्रै सेयर वापतको रकम दिनुभएको हो । त्यो पनि पूरा अझै दिनुभएको छैन ।’ कुमार अहिले पनि रामेश्वरले आफूलाई अझै १ करोड ७० लाख रुपैयाँ दिन बाँकी रहेको दावी गरे ।
यस विषयमा क्या. थापासँग पटक—पटक सम्पर्क गर्दा उनी सम्पर्कमा आउन चाहेनन् ।
