काठमाडौं—अहिले नेपालको चिकित्सा शिक्षामा मेडिकल कलेजहरु किनबेचको सिजन सुरु भएको छ । काठमाडौं मेडिकल कलेजमा १ अर्ब ७० करोड रुपैयाँ लगानी गरेर सुनिल शर्मा भित्रिएको दुई महिना नपुग्दैं देवदह मेडिकल कलेजमा पनि नयाँ व्यवस्थापन भित्रिन लागेको हो ।
१ सय करोड रुपैयाँभन्दा बढी लगानी गरेर देवदह मेडिकल कलेजमा पाल्पामा लुम्बिनी मेडिकल कलेज सञ्चालन गरिरहेको गोपाल पोखरेलको समूह भित्रिन लागेको हो । दुई मेडिकल कलेजको व्यवस्थापनबीच सेयर किनबेचको प्रक्रियासमेत अन्तिम चरणमा रहेको बताइएको छ ।
देवदह मेडिकल कलेजका अध्यक्ष निलकण्ठ काफ्लेले लुम्बिनी मेडिकल कलेजका सञ्चालकहरुको देवदहको व्यवस्थापनमा इन्ट्री हुन लागेको कुरा पुष्टि गरे । ‘उहाँहरु आउने पक्कापक्की भएर प्रक्रिया अगाडि बढिसकेको छ,’ काफ्लेले हेल्थआवाजसँग भने ।
स्रोतकाअनुसार कलेजको लगानी २ सय करोड बढी छ । लुम्बिनी मेडिकल कलेजको टिमले देवदहको ५० प्रतिशत सेयर लिन लागेको हो । जसका लागि लुम्बिनी मेडिकल कलेज समूहले १ सय करोडभन्दा बढी खर्चिनेछ । तर, दुवै पक्षले कति सेयर र कति रुपैयाँमा किनबेच हुन गइरहेको हो भन्ने कुरा भने खुलाउन चाहेनन् ।
लुम्बिनी मेडिकल कलेजका अध्यक्ष गोपाल पोखरेलले पनि आफूहरुले देवदहमा लगानी गर्न लागेको कुरा स्वीकार गरे । ‘हाम्रो (लुम्बिनी मेडिकल कलेज) टिमले देवदह मेडिकल कलेजको केही प्रतिशत सेयर किन्ने प्रक्रिया अगाडि बढेको छ,’ पोखरेलले भने, ‘पूरानो टिमको केही साथीहरु रहनुभएको छ । केही साथीहरुले छोड्ने मनस्थिती बनाउनुभएको छ ।’ तर, देवदह मेडिकल कलेज सञ्चालकमध्ये कसले सेयर बेच्दैछ भन्ने कुरा भने उनले खुलाउन चाहेनन् ।
विगत १६ वर्षदेखि सञ्चालनमा रहेको लुम्बिनी मेडिकल कलेज पब्लिक लिमिटेडमा रहेको छ । जसमा १ सय ४४ जना लगानीकर्ता रहेका छन् भने अहिलेसम्म उक्त कलेजमा २ अर्बभन्दा बढी लगानी भइसकेको पोखरेलले बताए । देवदह मेडिकल कलेजले भने एमबीबीएसको छैटौं ब्याचको तयारी गरिरहेको छ । देवदहमा काफ्ले, भारतीय नागरिक डा. रजनीश जिन्डल, गौतम वुद्ध इन्टरनेशल मेडिकल समूहसहित लगानी रहेको छ ।
