विराटनगर—विराटनगरमा प्राकृतिक चिकित्सा पद्धतिबाट उपचार गर्ने अस्पताल सञ्चालनमा आएको छ । आइतबार प्रदेश १ का मुख्यमन्त्री शेरधन राईले एक समारोहबीच वेलनेस हस्पिटलको औपचारिक उद्घाटन गरेका हुन् ।
विराटनगरका ४ जना महिला उद्यमीहरुले साढे सात करोड रुपैयाँ लगानी गरेर ‘ओम वेलनेस हस्पिटल’ सञ्चालनमा ल्याएका हुन् । विराटनगर २ मा सञ्चालित अस्पतालले वैकल्पिक चिकित्सा विज्ञानमा आधारित भएर उपचार गर्ने जनाएको छ ।
आधुनिक उपचार पद्दतिको विकल्पमा औषधि, सुई र चिरफार नगरी योग, अकुपञ्चर, फिजियोथेरापी, वाथ तथा न्युट्रिसनको माध्यमबाट बिरामीको उपचार गरिने वेलनेस अस्पताल काठमाडौंका अध्यक्ष डा. जगतबहादुर बस्नेतले जानकारी दिए । प्राकृतिक जीवनशैलीलाई प्रयोग गरी रोगीलाई निरोगी बनाउने र निरोगीलाई दीर्घजीवि बनाउनेतर्फ अस्पतालले योगदान गर्ने बताइएको छ ।
अस्पतालले शिरोधारा, योगा, मड थेरापी, जाकुजी, स्टिम बाथ, साउनाबाथ, अकुप्रेसर, अकुपञ्चर, फिजियोथेरापी, मायो तथाम्यानिपुलेसन थेरापी, इलेक्ट्रोथेरापी, न्यूरो पुनस्थापना, मसाज थेरापी, डिलक्स हाइड्रो थेरापीजस्ता सेवाहरु प्रदान गर्नेछ । अस्पतालको औपचारिक उद्घाटन गर्नुहुँदै मुख्यमन्त्री शेरधन राईले संसारभरि प्राकृतिक उपचार पद्धती प्रभावकारी बन्दै गएको अवस्थामा विराटनगरमा पनि सेवा सुरु भएकोमा आफू उत्साहित भएको बताए ।
गर्धनमा देखिएको समस्या समाधानका लागि केही समय प्राकृतिक उपचार सेवा लिएको भन्दै अनुकूल भएमा अस्पतालबाट नियमित सेवा लिने बताए । अस्पतालबाट प्रदेश १, छिमेकी प्रदेश र छिमेकी देशका नागरिकहरुले समेत सेवा लिनसक्ने अवसर सिर्जना भएको बताए ।
सामाजिक विकासमन्त्री जीवन घिमिरेले आयुर्वेद र प्राकृतिक चिकित्सा नेपालमा मूल उपचार पद्धति हुनुपर्नेमा समयानुकूल विकास नहुँदापछि परेको बताए । उनले आमाहरुले जडिबुटी थैलीमा राखेर विभिन्न रोगहरुको घरेलु विधिबाट उपचार गर्ने ज्ञान हराउँदै गएकोप्रति चिन्ता जनाउँदै प्राकृतिक उपचार पद्धतिलाई संरक्षण गर्नुपर्नेमा जोड दिए ।
विराटनगर महानगरपालिकाका प्रमुख भीम पराजुलीले विराटनगरमा फरक तर आवश्यक प्रकृतिको सेवा प्रदान गर्ने अस्पताल सञ्चालनमा आएको भन्दै खुसी व्यक्त गरे । कार्यक्रममा प्रतिनिधिसभा सदस्य अमनलाल मोदी, डा.जगतबहादुर बस्नेत, अस्पतालका अध्यक्ष शिवा उपाध्यायलगायतले बोलेका थिए ।
विराटनगर–२ सौगात मार्ग बरगाछीमा स्थापना भएको अस्पतालमा तत्काल प्रकृति सिंह केसीले प्राकृतिक चिकित्सा सेवा प्रदान गर्ने भने डा. मोहमद जावेदले फिजियोथेरापी सेवा दिनेछ । सोमबारदेखि तीन दिनसम्म अस्पतालले निःशुल्क उपचार सेवा प्रदान गर्न शिविर सञ्चालन गर्ने घोषणा पनि गरेको छ । यो हस्पिटलको अध्यक्ष शिवा उपाध्याय (अञ्जु) रहेकी छिन् । संचालकहरूमा नमिता न्यौपाने, राधा ढकाल (अधिकारी) र बिना कार्की रहेकी छन् ।
