विराटनगर—विराटनगर हस्पिटल चोकमा रहेको संजीवनी हस्पिटलमा सञ्चालकहरुबीच लफडा हुँदा सुरक्षा गार्डमाथि निर्घात कुटपिट भएको छ । शनिबार विहान ९ बजेतिर अस्पतालका सञ्चालकहरुबीचको लफडाले सुरक्षा गार्ड सत्यनारायण यादव र विष्णु पौडेलले कुटाइ खाएका हुन् ।
अस्पतालका सञ्चालक डा. विशाल अग्रवाल, डा. सुमित घिमरे, डा. ओकार अहमत र अरविन्द राजवंशीले सुरक्षा गार्डलाई कुटपिट गरेर चौथो तलामा रहेको कार्यलयको ढोका तोडफोड गरेको अर्का सञ्चालक दिवाकर यादवले बताए । ‘शनिबार विहान ९ बजेतिर हस्पिटलका डा. विशाल अग्रवाल, डा. सुमित घिमरे, डा. ओकार अहमत, अरविन्द राजवंशीले हात हतियारसहित हस्पिटल आएको सीसी टिभी फुटेजमा देखिन्छ । गार्डले रोक्न खोज्दा सुरक्षा गार्डलाई निर्घात कुटपिट गरे । त्यसपछि अफिस तोडफोड भयो । चौथो तलामा कार्यालय रहेको छ । अफिसको ढोका, लकर र ल्यापटप पनि लिएर गएका छन् । अफिसमा राखिएको ५ लाख रुपैयाँ हराएको छ । उनीहरुले लगेको हुनुपर्छ । हामी यस विषयमा मोरङ प्रहरीमा पनि जानकारी गराएका छौं,’ उनले भने ।
पुरानो एम्स हस्पिटलको नामले चलेको यो हस्पिटल पछिल्लो समयमा नयाँ सेयर सदस्यहरुबीचको आर्थिक विवाद उत्कर्षमा पुगेको थियो । डा. विशालसहित चार जना सञ्चालक एकातिर रहेका छन् भने दिवाकर एक्लै एकापट्टी रहेका छन् । हस्पिटलमा सबैभन्दा बढी सेयर होल्डर दिवाकर रहेका छन् । पछिल्लो समय उनले डा. विशालको समूहलाई हस्पिटल चलाउन दिएका थिए । उहाँहरुले हस्पिटल चलाउन नसकेपछि आफै हस्पिटल चलाउँदै आएको दिवाकरको भनाइ छ ।
यसअघि दिवाकरले हस्पिटल चलाउँदा आर्थिक रुपमा टाट पल्टिएपछि एक वर्ष अघि हस्पिटल बन्द भएको थियो । त्यसपछि डा. विशाल अग्रवालसहितको टिम भित्र्याएर संजीवनी हस्पिटल सञ्चालनमा आएको थियो । डा. अग्रवालसहितको टिम आएको एक वर्ष वित्न नपाउँदै अहिले यादवसँग झगडा भएको हो ।
यता हस्पिटलका डा. विशाल अग्रवालले भने आफूले कसैलाई पनि कुटपिट नगरेको दाबी गरे । ५० शैय्याको संजीवनी हस्पिटलको म्याद सकिएको र नयाँ नवीकरण गरेर मात्रै हस्पिटल सञ्चालन गर्नुपर्नेभन्दा दिवाकरसँग विवाद भएको बताए ।
‘करिब दुई महिनाअघि हस्पिटलको नवीकरणको म्याद सकिएको थियो । हामीले कानुनी प्रक्रिया पूरा गरेर मात्रै हस्पिटल चलाउ भनेका थियौं । दिवाकरजी मान्नुभएन्,’ उनले भने, ‘शनिबारदेखि सेवा नदिने र हस्पिटल बन्द गर्ने भनेका थियौं। हामी कानुनी प्रक्रिया पुरा गरेर मात्रै हस्पिटल चलाउभन्दा उहाँ गाली गलौजमा उत्रिनुभएको हो ।’
