विराटनगर–कोशी प्रदेश सरकारको बेवास्ता कारण नाजुक बनेको विराटनगरस्थित शैलजा आचार्य हृदय रोग केन्द्रमा कार्यरत चिकित्सक र स्वास्थ्यकर्मीहरुको करार म्याद थप नभएको एक महिना भएको छ । कोशी प्रदेशको स्वास्थ्य मन्त्रालयले काम गर्ने चिकित्सक र स्वास्थ्यकर्मीहरुको करार म्याद थप नगरिदिएको एक महिना बितेको छ ।
केन्द्रमा कार्यरत चिकित्सक र स्वास्थ्यकर्मीहरुले पटक—पटक लिखित रुपमा निवेदन दिँदा पनि करार म्याद थप भएन् । जसका कारण बुधबारदेखि त्यहाँ कार्यरत चिकित्सक तथा स्वास्थ्यकर्मीहरुले केन्द्रको ओपीडी सेवा बन्द गरेर आन्दोलनमा उत्रिएका हुन् ।
कोशीको स्वास्थ्य मन्त्रालयले ६–६ महिनामा करारका चिकित्सक र स्वास्थ्यकर्मीहरुको करार म्याद थप गर्दै आएको थियो । यस पटक पुस मसान्तसम्मको मात्रै करार म्याद थपको अवधि रहेको थियो । करार म्याद थपको अवधि सकिएपछि पुनः थपका लागि पत्रचार गर्दा पनि स्वास्थ्य मन्त्रालयले कुनै सुनवाई नगरेको शैलजा आचार्य हृदय रोग उपचार केन्द्रका प्रमुख डा. सर्वेशकुमार झाले बताए ।
डा. सर्वेश
‘हामीले करार म्याद थपका लागि पटक—पटक स्वास्थ्य मन्त्रालय र मुख्यमन्त्री कार्यलयमा पनि भनेका छौं । अहिलेसम्म पनि म्याद थप भएर पत्र आएन । बाध्य भएर अहिले हामी आन्दोलनमा उत्रिनु परेको छ,’ उनले भने, ‘बुधबार शान्तिपूर्ण रुपमा विरोध गरेका छौं । आज बिहीबारदेखि पूर्ण रुपमा ओपीडी बन्द गर्ने निर्णयमा हामी पुगेका छौं ।’ मन्त्रालयले करार म्याद थप गरेर पत्र दिएपछि मात्रै सेवामा फर्किने डा. झाले बताए । सेवा बन्द गर्ने बारेमा यसअघि नै स्वास्थ्य मन्त्रालय र मुख्यमन्त्री तथा मन्त्रिपरिषदको कार्यलयमा पनि जानकारी गराएको उनले बताए ।
‘शैलजा आचार्य हृदय रोग केन्द्र, विराटनगरमा कार्यरत करारका कर्मचारीहरुको म्याद २०८१ पौष मसान्तसम्म मात्र रहेकोले सो को जानकारी नियमानुसार सबै प्रक्रिया पूरा गरेर यस अस्पतालबाट समयमा नै पठाइसकेको र सो को जानकारी पटक—पटक गराउँदा पनि हालसम्म तहाँ मन्त्रालय बाट म्याद थपको पत्र न आएकोले अब उप्रान्त म्याद थप बिनाको करार कर्मचारीहरुसँग कामकाज गर्न असमर्थ भएकोले मिति २०८१/१०/२३ गतेदेखि यस अस्पताल सञ्चालनमा बाधा पुग्ने हुँदा सो को जानकारीको लागि अनुरोध छ,’ स्वास्थ्य मन्त्रालय र मुख्यमन्त्री तथा मन्त्रिपरिषद्को कार्यालयलाई चिकित्सकले पठाएको पत्रमा उल्लेख छ ।
चिकित्सक र स्वास्थ्यकर्मीहरुको आन्दोलनका कारण दैनिक ओपीडीमा आउने २५ देखि ५० जनासम्म बिरामी अहिले समस्यामा परेका छन् । उनीहरु अस्पताल पुगेर उपचार नपाएरै घर फर्किन बाध्य भएका छन् । मोरङ रतुवामाई नगरपालिका ५ का ७७ वर्षीय रत्नबहादुर श्रेष्ठ पाँच वर्षदेखि मुटुका बिरामी छन् । उनी मुटु रोग विशेषज्ञ डा. झासँग स्वास्थ्य परामर्श लिएर औषधि सेवन गर्दै आएका छन् ।
बुधबार फलोअपको लागि हृदय रोग उपचार केन्द्र आएका थिए । तर, चिकित्सकहरुको आन्दोलनको कारणले उनले चिकित्सकलाई देखाएर औषधि खान पाएनन् । ‘तीन घण्टा लगाएर हस्पिटल आए । चिकित्सकको आन्दोलन रहेछ । आन्दोलनको कारणले चिकित्सकलाई भेटन नपाइ घर फर्किनु प¥यो,’ अस्पताल परिसरमा भेटिएका श्रेष्ठले भने, ‘अब आन्दोलन सकिएपछि फर्केर चिकित्सकलाई देखाएर फेरि औषधि सेवन गर्नेछु ।’
कोशी प्रदेशको स्वास्थ्य मन्त्रालयकी सचिव डा. राधिका थपलियाले चिकित्सक र स्वास्थ्यकर्मीहरुको करारको म्याद थप भइसकेको बताइन् । ‘करार म्याद थप गर्ने निर्णय भइसकेको छ । पत्र नपुगेको हुन सक्छ,’ डा. थपलियाले भनिन्, ‘डा. सर्वेशको बुधबार करार म्याद थप गर्ने निर्णाय भएको छ । पत्र नगएको हुन सक्छ । हामी यस विषयमा बुझनेछौं ।’
तर, डा. सर्वेशले भने बिहीबार दिउँसो १ बजेसम्म मन्त्रालयबाट कुनै पनि पत्र नआएको बताए । ‘मलाई मन्त्रालयबाट कुनै पनि जानकारी अहिलेसम्म आएको छैन । करारमा म्याद थप गरेको विषयमा जानकारी पनि छैन । मैले करार सकिएको र पुनः करार म्याद थपको लागि जानकारी दिएको तीन दिन भइसक्यो,’ उनले थपे, ‘उहाँहरुको वेवास्ताका कारण म्याद थप नभएपछि हामीले सेवा दिन सकेका छैनौं । यसको सम्पूर्ण जिम्मेवारी प्रदेश सरकार र मन्त्रालयले लिनुपर्छ । उहाँहरुको कारणले यस्तो समस्या भएको हो ।’
हृदय रोग उपचार केन्द्रमा एक जना मुटु रोग विशेषज्ञ, तीन जना नर्स र नौ जना कर्मचारी कार्यरत छन् ।
