विराटनगर—नेपाल न्यूरो सर्जन समाजको ११ औं राष्ट्रिय सम्मेलन सुनसरीको इटहरीमा हुने भएको छ । शुक्रबारदेखि सुरु हुने सम्मेलन दुई दिनसम्म चल्नेछ ।
बिहीबार समाजले विराटनगरमा पत्रकार सम्मेलन गरी सम्मेलनको सम्पूर्ण तयारी पूरा भएको जानकारी गराएको छ । सम्मेलनमा देशभरका न्यूरो सर्जनहरुको सहभागिता रहने नेपाल न्यूरो सर्जन समाजका अध्यक्ष तथा वरिष्ठ न्यूरो सर्जन डा. यमबहादुर रोकाले जानकारी दिए ।
दुई दिनसम्म संचालन हुने सम्मेलनमा देशभरका न्यूरो सर्जनसहित सम्बन्धित विशेषज्ञ चिकित्सक, नर्स, प्राविधिक, फिजियोथेरापिष्ट तथा नेपाल बाहिरका विशेषज्ञ गरेर करिब १५० बढीको सहभागी रहने उनले बताए ।
सम्मेलनमा एक सयभन्दा बढी अनुसन्धान कार्यपत्र प्रस्तुत हुने समाजका वरिष्ठ उपाध्यक्ष न्यूरो सर्जन डा. सुदन ढकालले बताए । ‘दुई दिनसम्म चल्ने सम्मेलनमा विदेशबाट आएका चिकित्सकहरुको पनि सहभागिता रहनेछ । विज्ञ समूहबाट एक सयभन्दा बढी अनुसन्धान कार्यपत्र प्रस्तुत हुनेछ,’ उनले भने, ‘विभिन्न विधाहरुमा सर्वश्रेष्ठ कार्यपत्र प्रस्तुतिलाई सम्मान र पुरस्कार पनि प्रदान गरिनेछ ।’
सम्मेलनको उद्घाटन कोशी प्रदेशका मुख्यमन्त्री हिक्मतकुमार कार्कीले गर्नेछ । पूर्वमा न्यूरो सर्जन समाजको राष्ट्रिय सम्मेलन पहिलो पटक भएको हो । न्यूरो सर्जरी सेवाको विस्तारसँगै आम जनतामा चेतना फैलाउने साथै त्यस क्षेत्रमा कार्यरत चिकित्सकहरुको मनोबल वृद्धि यो सम्मेलन गर्ने अध्यक्ष रोकाले बताए ।
राष्ट्रिय सम्मेलनको अवसर पारेर समाजले बिहीबार विराटनगरस्थित नोबेल मेडिकल कलेजमा एक दिने कार्यशाला गोष्ठी पनि आयोजना गरेको छ । उक्त गोष्ठीमा विज्ञ चिकित्सकहरुले विभिन्न विषयहरुमा जानकारी गराएका छन् ।
