नेपाल डेन्टल एसोसिएसनको २४ औं वार्षिक राष्ट्रिय सम्मेलन विराटनगरमा पहिलो पटक हुन गइरहेको छ । शनिबार हुने एसोसिएनको राष्ट्रिय सम्मेलनमा सहभागी हुन देशभरका दन्त्त चिकित्सक विराटनगर आइपुगेका छन् । मेडिकल काउन्सिलबाट ४ हजार ९ सय बढी डेन्टलका चिकित्सकले लाइसेन्स लिएका भएपनि आधा अर्थात करिब २ हजार ४०० चिकित्सक मात्रै नेपाल डेन्टल एसोसिएनमा आवद्ध छन् । जसमध्ये ४०० बढी चिकित्सक यो सम्मेलनमा सहभागी हुँदैछन् । डेन्टल एसोसिएनको राष्ट्रिय सम्मेलनमा केन्द्रीत रहेर नेपाल डेन्टल एसोसिएसनका केन्द्रीय अध्यक्ष प्रा.डा. प्रणयरत्न शाक्यसँग हेल्थआवाजका लागि कोशी प्रदेश संयोजक अनिल श्रेष्ठले गरेको संक्षिप्त कुराकानी :
डेन्टल एसोसिएसनको राष्ट्रिय सम्मेलनको तयारी कहाँ पुग्यो ?
विराटनगरमा शनिबार विहान हुने नेपाल डेन्टल एसोसिएसनको २४ औं वार्षिक राष्ट्रिय सम्मेलनको सम्पूर्ण तयारी पूरा भएको छ । देशभरका डेन्टल चिकित्सकहरु सम्मेलनमा सहभागी हुन विराटनगर आइपुगेका छन् । राष्ट्रिय सम्मेलन सफल बनाउन नेपाल डेन्टल एसोसिएसन मोरङका अध्यक्ष डा. पवन मेहताको संयोजत्वमा ४३ सदस्यीय मूल समारोह समिति बनाइएको छ । सम्मेलनमा देशभरका ४०० दन्त चिकित्सकहरुको सहभागिता हुनेछ । काठमाडौं बाहिर विराटनगरमा पहिलो पटक हुन लागेको यो सम्मेलन भव्य र सभ्य रुपमा सम्पन्न गर्न हामी सबै एक ढिक्का भएर लागि परेका छौं ।
काठमाडौं बाहिर राष्ट्रिय सम्मेलन पहिलो पटक हुँदैछ । यो सम्मेलनमा के हुनेछ ?
राष्ट्रिय सम्मेलनमा करिब १६ जना राष्ट्रिय तथा अन्तर्राष्ट्रिय ख्यातिप्राप्त वक्ताहरुको सहभागिता रहनेछ । त्यसबाहेक दर्जनौ दन्त्त चिकित्सकहरुले आफूले गरेको उपचारको सन्दर्भमा गरेको वैज्ञानिक कागज पोस्टरहरु सम्मेलनमा प्रस्तुत गर्नेछन् । सम्मेलनमा दन्त चिकित्साको क्षेत्रमा आएको नवीनतम उपकरणहरुका करिब ३० वटा कम्पनीले चिकित्सकहरुका सामु प्रदर्शनी पनि गर्नेछन् । सम्मेलनको मुख्य थिम भनेको दन्त चिकित्सामार्फत सुन्दर मुस्कान सिर्जना गर्दै अगाडि बढनु हो । यो सम्मेलनले दन्त चिकित्साको क्षेत्रमा भएका नवीनतम उपचार पद्धतिका सन्र्दभमा चिकित्सकहरु बीच आपसी अनुभव साटासाटसँगै भातृत्व समेत विकास गर्ने विश्वास छ ।
यो सम्मेलनले सरकारको ध्यानाकर्षण पनि गराउनेछ । अहिले चिकित्सकहरु अध्ययन पूरा गरेर विदेश जाने परिपाटी रहेको छ । त्यो रोक्न राज्यले जरुरी छ । यहाँको जनशक्तिको राज्यले उपभोग गर्नुपर्छ । त्यसको लागि राज्यले लोकसेवा खुलाएर यहाँको दक्षजनक्तिलाई यही स्वरोजगार दिने व्यवस्था गरिनुपर्दछ ।
विराटनगर सम्मेलनले के सन्देश दिनेछ ?
मान्छेहरुमा जनचेतना पनि फैलाउन जरुरी छ । दन्त्त चिकित्सकले गर्ने काम डाक्टरले गर्ने काम हो । नेपाल मेडिकल काउन्सिलमा आवद्ध नभएको र लाइसेन्स नभएकाहरुले अहिले काम गरेर चिकित्सकहरुको बदनामी भइरहेको छ । यो विषयमा राज्यले अनुगमन र निरीक्षण गरेर रोक्नु पर्दछ । यसमा जनचेतना पनि फैलाउन जरुरी छ । आम जनतालाई यस विषयमा बुझाउन जरुरी छ । मान्छेहरुको बुझाइ दातको भनेको एक जना डाक्टर भन्ने छ । दातको फरक–फरक डाक्टर हुन्छन् । विभिन्न विशेषज्ञता हासिल गरेका चिकित्सकहरु रहेका छन् । मुख तथा दात्तको स्वास्थ्यमा आम नागरिकलाई सहजता बनाउनु पर्छ । त्यसमा राज्यले लगानी गर्नुपर्छ ।
सम्मेलनको अघिल्लो दिन कार्यशाला पनि गर्दै हुनुहुन्छ । उक्त कार्यशालमा के—के हुन्छ ?
दन्त्त चिकित्साको क्षेत्रमा आएको नवीनतम प्रयोग र यस विषयमा जानकारी दिन हामीले कार्यशाला गोष्ठी राखेका हौं । राष्ट्रिय सम्मेलनको अवसर पारेर एसोसिएसनले विराटनगरको तीन ठाउँमा यो कार्यशाला राखेको हो । दन्त चिकित्साको तीन भिन्न क्षेत्रको विषयमा जानकारी दिने उद्देश्यले तीन ठाउँमा २५ जनाको समूह बनाएर ७५ जना चिकित्सकहरु वर्कसपमा सहभागी छन् ।
