विराटनगर—विराटनगरस्थित न्युरो कार्डियो एण्ड मल्टिस्पेशियालीटी अस्पतालले २४ औं वर्ष पुरा भएको अवसर विभिन्न कार्यक्रम आयोजना गरेको छ । शनिबार अस्पतालले विभिन्न कार्यक्रम आयोजना गरी २३ औं वार्षिकोत्सव मनाएको हो ।
वार्षिकोत्सवको अवसरमा अस्पतालले भर्ना भएका बिरामीहरु तथा बिरामीका कुरुवाहरुलाई फलफुल तथा खाजा वितरण गरेको छ । त्यसैगरी एक कार्यक्रमको आयोजना गरेर २४ जना कर्मचारीलाई विशेष कदर पत्रप्रदान गरेको छ ।
सम्मानित कर्मचारीहरुलाई अस्पतालका अध्यक्ष तथा वरिष्ठ न्युरोलोजिष्ट डा. वीरेन्द्रकुमार विष्ट, कार्यकारी निर्देशक डा. अनिशा विष्ट, मेडिकल डाइरेक्टर तथा वरिष्ठ फिजिसियन डा. विवेक कट्टेलले प्रमाणपत्र वितरण गरेका थिए । सोही कार्यक्रममा बोल्दै अस्पतालका कार्यकारी निर्देशक डा. विष्टले अस्पतालले बिरामीहरुको स्वास्थ्य र कल्याणलाई केन्द्रमा राखेर सेवा प्रदान गर्दे आएको बताइन् ।
अस्पतालले वार्षिकोत्सवको अवसर पारेर टाउको दुखाइको बिरामीहरुको लागि ९ देखि १४ भदौंसम्म वरिष्ठ विशेषज्ञ न्युरोलोजिष्ट डा. वीरेन्द्रकुमार विष्ट तथा विशेषज्ञ डा. सुनन्द पौडेलको ओपीडी सेवा निःशुल्क गरेको छ । त्यसैगगरी सोही अवधिभर २४ वटा विशेष जाँचमा २४ प्रतिशतसम्म छुटको व्यवस्था गरेको अपतालले जनाएको छ ।
वार्षिकोत्सवकै अवसर पारेर अस्पतालले एक हप्तासम्म घरदैलो कार्यक्रम गर्ने बताएको छ । अस्पताल रहेको वडा नं १० मा रहेको घर—घर गई अस्पतालले प्रदान गर्ने स्वास्थ्य सेवामा छुट सहितको कार्ड वितरण गर्ने जनाएको छ ।
