विराटनगर—विराटनगरस्थित न्यूरो कार्डियो एण्ड मल्टिस्पेशियालिटी हस्पिटलले नेपालमै पहिलो पटक एआई पावर्ड १ सय २८ स्लाइस क्षमताको नयाँ सिटी स्क्यान मेसिन र डेक्सा स्क्यान मेसिन संचालनमा ल्याएको छ । बिहीबार हस्पिटलमा एक कार्यक्रम आयोजना गरी उक्त मेसिनको उद्घाटन गरी संचालनमा ल्याइएको हो ।
सिटी स्क्यान मेसिन र डेक्सा स्क्यानको उद्घाटन कोशी प्रदेशका मुख्यमन्त्री हिक्मतकुमार कार्कीले गरेका हुन् । संचालनमा आएको सिटी स्क्यान मेसिनबाट टाउको, नसा, हाडलगायतको जाँच गरिनुको साथै यसबाट मुटुको एन्जियोग्राफी पनि गरिने अस्पतालका अपरेसनल डाइरेक्टर राजेश भट्टराईले जानकारी दिए ।
सिटी स्क्यान मेसिन अमेरिका कम्पनीको पाँच करोड रुपैयाँमा खरिद गरेर ल्याएको हो । सिटी स्क्यानको सहायताले शरीरभित्रका हड्डी, नसा र तन्तुहरूको जाँच गरिन्छ । विषेशगरी मतिष्कघात, मतिष्कभित्रका चोट, नसामा रगत जमेको, घाँटीको समस्या, क्यान्सर, हड्डीको समस्या, पेटको समस्याको पहिचानमा यो मेसिन उपयोगी हुने अस्पतालका वरिष्ठ हार्डजोर्नी तथा नसा रोग विशेषज्ञ डा. नवीनकुमार कर्णले बताए । उनले सिटी स्क्यान मेसिनको स्लाइस क्षमता जति बढी भयो उति राम्रो रिपोर्ट आउने यसका साथै छिटो पनि हुने बताए ।
![](https://ap-south-1.linodeobjects.com/healthaawaj/2024/07/15629942-1864-483b-a3eb-fe3ac0f23f6c.jpeg)
न्यूरो अस्पतालले स्थापनाकालदेखि नै प्रविधीको प्रयोगलाई जहिले पनि प्राथमिकतामा राखी ठूलो लगानी गर्दै आएको अस्पतालका अपरेशनल डाइरेक्टर भट्टराईले बताए । ‘पछिल्लो ६ महिनाको अन्तरालमा अस्पतालले करोडौं लगानी गरेर दुई अत्याधुनिक तथा नवीनतम प्रविधीयुक्त उपकरण एमआरआई र हालै सिटी स्क्यान मेसिन भित्र्याएका छौं । जसले आगामी समयमा बिरामीको परीक्षण र उपचारमा अग्रगामी फडको मार्दै प्रत्यक्ष रुपमा सकारात्मक प्रभाव पार्ने कुरामा हामी विश्वस्त छौं,’ अपरेसनल डाइरेक्टर भट्टराईले भने ।
समयको मागसँगै न्यूरोले प्रदान गर्ने सेवाहरु परिष्कृत गर्दै लगेको बताएको छ । नवीनतम प्रविधीयुक्त अत्याधुनिक उपकरणहरु जडान गरेर भरपर्दो र गुणस्तरीय सेवा प्रदान गरेको उनले बताए । ‘न्युरो अस्पताल स्वास्थ्य सेवा प्रवाहमा आएको परिवर्तनको संवाहकको रुपमा अग्रपक्तिमा रहन चाहन्छ र सेवाग्राहीहरुको हरेक आवश्यक्ता र अपेक्षाहरुलाई समय सापेक्ष रुपमा सम्बोधन गर्दै अगाडि बढेको छ । स्वास्थ्य सेवा प्रवाहको विषयमा न्युरोले गम्भिर तथा जिम्मेवार थियो छ र भविष्यमा पनि रहनेछ,’ डाइरेक्टर भट्टराईले भने ।
सुविधा सम्पन्न क्याबिन
न्यूरो हस्पिटलले सुविधा सम्पन्न क्याबिन पनि संचालनमा ल्याएको छ । हस्पिटलको छैटौं तलामा होटल स्टेन्डरको क्याबिन संचालनमा ल्याएको हो ।
छैटौं तलामा सात वटा सुविधासम्पन्न क्याबिन बिहीबारदेखि संचालनमा आएको छ । बिरामी कुरुवा बस्नेसहितको क्याबिनमा सम्पूर्ण सेवाहरु उपलब्ध रहेको छ । क्याबिनमा डिलक्स रुमहरु रहेको छ ।