विराटनगर— धनकुटा जिल्ला अस्पतालमा कार्यरत पाँचौ तहका ल्याब टेक्निसियन अर्जुनकुमार मेहताको रहस्यमय मृत्यु प्रकरणमा पक्राउ परेकी प्रेमिका सुशीला कुमारी मेहतासहित दुई जना विरुद्ध मुद्दा दायर भएको छ ।
सुनसरीको देवानगन्ज गाउँपालिका–६ घर भएका २७ वर्षीय अर्जुनको आत्महत्या दुरुत्साहन मुद्दामा देवानगन्ज गाउँपालिका—१ की २३ वर्षीया सुशीला र चिन्टुकुमार मेहता विरुद्ध मोरङ अदालतमा बुधबार मुद्दा दायर भएको हो ।
चिन्टुकुमारलाई फरार प्रतिवादी बनाएर जिल्ला सरकारी वकिलको कार्यालयले मुद्दा दायर भएको छ । चिन्टु सुशीलाका भाइ हुन् ।
जिल्ला सरकारी वकिलको कार्यालयले मुलुकी अपराध संहिता २०७४ को दफा १८५ को उपदफा (१) बमोजिम पाँच वर्ष कैद र ५० हजार रुपैयाँसम्म वा बिगो वा कैद सजाय दुवै माग दाबी राखेर अभियोग दर्ता गरेको जिल्ला सरकारी वकिलको कार्यालय मोरङले जनाएको छ ।
अदालतमा अभियोग दर्ताभएपछि बिहीबार थुनछेक बहस सुरु हुने जिल्ला अदालत मोरङका सुचना अधिकारी ओम सुवेदीले जानकारी दिए । प्रतिवादीको अदालतमा बयान सकिएपछि थुनछेक हुनेछ । थुनछेक आदेशले पुर्पक्षको लागि थुनामा पढाउने, साधरण तारेखमा छोड्ने वा धौरौटीमा छाड्ने आदेश हुनेछ ।
अर्जुन असार ९ मा विराटनगर ११ पिचरास्थित कोठामा झुण्डिएको अवस्थामा शव भेटिएको थियो । अर्जुनका आफन्तहरुले सुशीला र उनका भाइ चिन्टुले आत्महत्या गर्न बाध्य बनाएको भन्दै मोरङ प्रहरीमा ‘आत्महत्या दुरुत्साहन’ मा किटानी जाहेरी दर्ता गराएको थियो । २५ असारमा सुशीला पक्राउ परेकी थिइन् । प्रहरीले अनुसन्धान पूरा गरेर जिल्ला सरकारी वकिलको कार्यालयमा प्रतिवेदन बुझाएको थियो । प्रहरीले बुझाएको प्रतिवेदनको आधारमा जिल्ला सरकारी वकिलको कार्यालयमा अभियोग दर्ता गरेको हो ।
सुशीला र अर्जुन विगत तीन वर्षदेखि प्रेम सम्बन्धमा रहेका थिए । उनीहरु लिभिङ टुगेदरमा बस्दै आएका थिए । प्रेमको नाटक गरेर सुशीलाले अर्जुनलाई ब्यालकमेलिङ गरेर धम्काउँदै ५० लाख रुपैयाँ माग गरेपछि अर्जुनले आत्महत्या गरेको उनले लेखेको सुसाइट नोटमा उल्लेख छ ।
