धरान—चिकित्सा विज्ञान क्षेत्रमा भएका नयाँ खोज र अनुसन्धानबारे चिकित्सक तथा स्वास्थ्यकर्मीहरुलाई जानकारी गराउने उद्देश्यले तेस्रो मेडिसिन उपडेट सुरु भएको छ । शुक्रबारबाट विपी कोइराला स्वास्थ्य विज्ञान प्रतिष्ठान धरानको मेडिसिन विभागको आयोजनामा सम्मेलन सुरु भएको हो ।
कार्यक्रमा विभिन्न रोगका विषयमा देशभरका चिकित्सकहरुले गरेका सोधपत्रहरु प्रस्तुत हुने र ती सोधपत्रमाथि छलफल हुने आयोजक समितिका संयोजक तथा प्रतिष्ठानका एडिसनल प्रोफेसर डा. रविन मास्केले जानकारी दिए । प्रतिष्ठानमा दुई दिनसम्म चल्ने कार्यक्रममा १४ वटा सोधपत्र प्रस्तुत हुने उनले बताए ।
कार्यक्रम स्वास्थ्य क्षेत्रमा नौलो प्रविधी र विकास कसरी गर्न सकिन्छ र नयाँ प्रविधि मार्फत चिकित्सा प्रणालीलाई कसरी प्रभावकारी बनाउन सकिन्छ भन्ने विषयमा केन्द्रित रहने प्रतिष्ठानका मेडिसिन विभागका प्रमुखसमेत रहेका संयोजक डा. मास्केले जानकारी दिए । कार्यक्रममा देशभरका विशेषज्ञहरुको उपस्थिति रहेको उनले बताए ।
कार्यक्रमा विशेष चिकित्सकहरु, नेपालभर विभिन्न कलेजमा एमडी अध्ययनरत चिकित्सकसँगै नर्स तथा स्वास्थ्यकर्मीहरुको समेत सहभागिता छ । प्रस्तुत भएका सोधपत्र मध्ये ३ वटालाई एवार्ड प्रदान गरिनेछ ।
यस्तै, विभिन्न मेडिकल कलेजमा एमडी गरिरहेका विद्यार्थीहरुबीच क्वीज प्रतियोगितासमेत गराइने आयोजक समिति सदस्य डा भुपेन्द्र शाहले बताए । सन् २००१ बााट सुरु भएको यो कार्यक्रम सन् २०२२ मा दोस्रो पटक भएको थियो ।
