विराटनगर – विराटनगरस्थित कोशी अस्पतालका डोर हाजिरमा काम गर्ने कर्मचारीहरू आन्दिलत भएका छन् । उनीहरूले करारमा नियुक्ति गरिनुपर्ने माग राख्दै शुक्रबार आन्दोलन गरेका हुन् ।
१५ वर्षदेखि डोर हाजिरमा काम गर्दै आएका करिब ७० जना कर्मचारीहरूले करारमा नियुक्ति गरिनुपर्ने भन्दै शुक्रबार सरसफाइ कार्यक्रम रोकेर विरोधमा उत्रिए । डोर हाजिरमा काम गर्ने कार्यालय सहयोगी र स्वीपर रहेका छन् ।
भएका ज्याला दरीका कर्मचारीलाई बाइपास गरेर अस्पतालले करारमा ७ जना कार्यालय सहयोगी नियुक्ति गर्ने तयारी गरेपछि उनीहरु आन्दोलित भएका हुन् । आकस्मिक कक्ष र एनआइसियू संचालन गर्ने भन्दै अस्पतालले करारमा कर्मचारी नियुक्ति गर्ने तयारी गरेको हो ।
यहाँ कार्यरत डोर हाजिरका कर्मचारीहरुले भने भएका कर्मचारीहरु व्यवस्थापन गरेर १५ वर्षदेखि काम गर्दै आएका ज्यालादरी कर्मचारीलाई करारमा नियुक्ति गर्नुपर्ने भन्दै आन्दोलनमा उत्रिनुपर्ने अवस्था अएको एक जना कर्मचारीले बताए । ‘हामी वर्षौ देखि ज्यालादारीमा काम गर्दै आएका छौं । आजसम्म कोशी अस्पतालमा काम गरेको १५ वर्ष भइसक्यो । तर, हामीलाई राज्य स्थाइ वा करारमा नियुक्ति गर्ने चासो देखाएन,’ एक जना ज्याला दरीका कर्मचारीले भने, ‘अहिले हस्पिटलमा करारमा कार्यालय सहयोगी नियुक्ति गर्ने तयारी गरिएको छ । यहाँ भएका कर्मचारीलाई नियुक्ति गर्नुको साटो बाहिरबाट आफ्नो मान्छे ल्याउने खेलमा हस्पिटल प्रशासन लागि परेको छ ।’
यता अस्पताल विकास समितिका सदस्य मुकेश बुढाथोकीले अस्पतालमा थप नयाँ सेवा सुचारु गर्ने भएकोले दक्ष जनशक्ति थप गर्ने तयारी गरिएको बताए । ‘कोशी अस्पतालको आकस्मिक कक्षा भित्र ल्याब र फार्मेसी संचालन गर्ने तयारी गरिएको छ । त्यसँगै बच्चाको एनआइसियू पनि संचालनको तयारी छ,’ उनले भने, ‘त्यसको लागि दक्ष जनशक्तिको आवश्यक पर्दछ । केही भएर केही संख्यामा यसअघि हस्पिटलमा भोलेन्टियर गर्दै आएका दक्ष व्यक्ति छनौट गरिने भनिएको हो ।’
