विराटनगर -विराटनगरस्थित विराट नर्सिङ होममा दुर्घटना परेर काटिएको हातको नशाको सफल शल्यक्रिया गरेर जोडिएको छ । विराट नर्सिङ होमका वरिष्ठ हाडजोर्नी तथा नशा रोग विशेषज्ञ डा. प्रदिप गुप्ताले दुर्घटनामा परेर हातको नशा काटिएर आएका बिरामी सुनसरी मधुवनका ४७ वर्षीय राजेश स्वर्णकारको सफल उपचार गरेका हुन् ।
१७ वैशाखमा सुनसरीमा म्याजिक गाडी दुर्घटनामा परेर स्वर्णकारको देब्रे हातको पाखुरा भित्रको हड्डीको नसा काटिएर त्यसदेखि मुनिको रक्त संचार बन्द भएको थियो । त्यसपछि उनलाई विराट नर्सिङ होममा ल्याइएको थियो । अस्पतालका डा. गुप्ताको नेतृत्वको टिमले लगातार ६ घण्टा शल्यक्रिया गरेर काटिएको नसा जोडेर हात काटने अवस्थाबाट जोगाउन सफल भएका हुन् ।
यसरी काटिएको नसालाई ब्रेकियल आरट्री जोडिएको उपचारमा संलग्न डा. गुप्ताले बताए । ‘यसरी उपचार गरिने प्रविधिलाई भास्कुलर सर्जरी भनिन्छ,’ डाक्टर गुप्ताले भने । भास्कुलर सर्जरी अहिले बिरलै हुने गरेको उनले सुनाए । एक दशक बढी विराट नर्सिङ हस्पिटलमा काम गर्दा अहिलेसम्म ६ वटा यस्तो केस आएको उनले सुनाए । आएको सबै केसहरू सफल भएको उनको भनाइ छ ।
यस्ता बिरामी ढिलो आए बचाउन नसकिने डाक्टर गुप्ताले सुनाए । हातको आरट्री काटिएको बिरामी जतिसक्दो चाँडै हस्पिटल आए बचाउन सकिने उनी बताउँछन् ।
‘अहिले सफल उपचार भएको बिरामीको हातबाट रगत कन्ट्रोल भएको थिएन । आरट्री कटिएको थियो । कुइनोमाथि हुन्छ एउटा मात्र ब्रेकियल आरट्री । यसले रगतलाई संचार गर्ने काम गर्दछ । माथिको आरट्री काटिएको थियो ।
बिरामी हस्पिटलमा दुर्घटना भएको एक घण्टा भित्र आइपुगेका थिए । यहाँ आउँदा बिरामीका अफान्त कोही थिएन्,’ डा. गुप्ताले भने, ‘ हामीले प्रहरीलाई साची राखेर अप्रेसन गरियो । ९ः १५ मा अप्रेसन गरेको विहान ३ः १५ मा अप्रेसन सकियो । यसरी ६ घण्टा लगाएर अप्रेसन गरी विरामीमा बचाएका छौं ।’
अप्रेसन गरेको दुई हप्तापछि शुक्रबार डिस्चार्ज गरिने उनले बताए । ‘अहिले बिरामी ठिक भएको छ । घाउ पनि ठिक भएकोले डिस्चार्ज दिने तयारी गरिएको हो,’ उनले भने ।
विराट नर्सिङ होममा नयाँ जीवन पाएको बिरामी स्वर्णकारले बताए । ‘हस्पिटल ल्याउँदा मेरो अवस्था एकदमै नाजुक रहेछ । अप्रेसन गरेको भिडियो हेरेपछि थाहा पाए । यहाँ ल्याएर चिकित्सकलाई देखाएपछि शल्यक्रिया गरेर दुई हप्तापछि ठिक हुँदै गएको छु,’ डिस्चार्जको अघिल्लो दिन स्वर्णकारले भने, ‘अहिले ठाउँ पनि ठिक हुँदै गएको छ ।’
