विराटनगर—मोरङको बुढीगंगा गाउँपालिका–२ मा रहेको विराट मेडिकल कलेज टिचिङ हस्पिटलको झण्डै एक करोड रूपैयाँ अस्पतालका कर्मचारीले नक्कली बिरामी खडा गरी घोटाला गरेको पाइएको छ ।
हस्पिटलको रिसेप्सन बिलिङ एण्ड डिस्चार्ज विभागका इन्चार्ज मोरङको सुनवर्षी नगरपालिका—२ का २६ वर्षीय दुर्गाबहादुर बिष्ट र सुनसरी इटहरी—४ का २४ वर्षीय अश्विन भट्टराईको मुख्य योजनामा १० जना कर्मचारीको मिलेमतोमा ५७ लाख ९६ हजार १ सय ६० रुपैयाँ घोटाला भएको प्रहरीको अनुसन्धानबाट खुलेको हो ।
मोरङ प्रहरीले विराट हस्पिटलको रकम घोटला गरी ठगी गरेको आरोपमा आठ जना पक्राउ गरेका थिए । पक्राउ परेकामध्ये सबैभन्दा बढी घोटला भट्टराई र विष्टले गरेको खुलेको छ । मोरङ अदालतमा दायर अभियोगमा उल्लेख भएको विवरणअनुसार डिस्चार्ज विभागका इन्चार्ज विष्टले २३ लाख ६६ हजार ६ सय १७ रुपैयाँ, भट्टराईले २३ लाख ९० हजार ७ सय ३१ रुपैयाँ अस्पतालको रकम अपचलन गरेको खुलेको छ ।
यस्तै, अस्पतालका अन्य कर्मचारीहरू स्वस्तिका श्रेष्ठले ५ लाख २६ हजार ७ सय ९१, सुनिल पासवानले १९ हजार ६ सय २७, प्रभुनारायण चौधरीले ३३ हजार ३ सय, सुशील पासवानले २ लाख ९८ हजार ५ सय ३, किरण विश्वकर्माले ६७ हजार ३ सय ३२, बसन्तकुमार रामले १० हजार र नरनारायण चौधरीले ५६ हजार ५ सय ७३ रुपैयाँ हिनामिना गरेको अदालतमा दायर भएको ठगी मुद्दाको अभियोग पत्रमा उल्लेख छ ।
हस्पिटलको कर्मचारीको मिलेमतोमा विराट टिचिङ हस्पिटलको ५ करोड रुपैयाँ हिनामिना भएको भन्दै कारवाहीको दायरामा ल्याउन मागसहित ३ कार्तिकमा मोरङ प्रहरीमा उजुरी दिएको थियो । प्रहरीमा उजुरी परेपछि विष्ट र भट्टराईलाई सोही दिन पक्राउ गरेको थियो । अन्य ८ जनाको पनि घोटलामा संलग्नता देखिएपछि पछि पक्राउ परेका थिए । प्रहरीले अनुसन्धान प्रतिवेदन सरकारी वकिलको कार्यालयमा बुझाएपछि शुक्रबार उनीहरु विरुद्ध मोरङ अदालतमा ठगी मुद्दा दायर भएको हो ।
मोरङ अदालतमा आइतबार र सोमबार प्रतिवादीहरुको बयान लिन सुरू भएको मोरङ अदालतका सूचना अधिकारी सुवोध आचार्यले जानकारी दिए । प्रतिवादीहरुको अदालतमा बयान सकिएकोले मंगलबार थुनछेक बहस हुने उनले बताए । घोटालामा संग्लन भएकामध्ये मुख्य नाइके विष्ट र भट्टराई रहेको बुझिएको छ । विष्ट चार वर्षदेखि र भट्टराई दुई वर्षदेखि हस्पिटलमा काम गर्दै आएका थिए ।
बिरामी डिस्चार्ज भएपछि भुक्तानी गर्नुपर्ने रकम डिस्चार्ज काउन्टरको इन्चार्ज भएकोले विष्ट र भट्टराईले बुझ्दै आएका थिए । उनीहरूले लिएको रकम लेखा शाखामा बुझाउँदै आएका थिए । पछिल्लो समय केही महिनादेखि विष्ट र भट्टराईले बिरामीले दिएको रकम लेखा शाखामा नबुझाई आफै राखेर करिब पाँच करोड हिनामिना गरेको हस्पिटलको दाबी थियो । पछि प्रहरीले उनीहरुलाई पक्राउ गरी अनुसन्धान गर्दा ५७ लाख ९६ हजार रुपैयाँ घोटाला भएको तथ्य र प्रमाण प्रहरीले संकलन गरेको छ ।
विष्ट र भट्टराईले १० जना हस्पिटलको कर्मचारीको युजर आइडी बनाएर हस्पिटलको रकम अपचलन गरेको देखिएको छ । भट्टराईले ‘आश्विन’ र विष्टले ‘दुर्गा’ नामको युजर आइटी बनाएर घोटला गरेको प्रहरीले जनाएको छ । अर्काको युजर आईडी र पासवर्ड प्रयोग गर्दै बिरामीका आफन्तले अस्पतालका नाममा जम्मा गरेको धरौटी वापतको रकम अनधिकृत रूपमा फिर्ता दिएर, नक्कली बिरामी खडा गरेर र अस्पतालको आधिकारिक व्यक्तिबाट स्वीकृति नलिइकन बिरामीको खाताबाट अस्वभाविक रूपमा छुट देखाएर आर्थिक अपचलन गरेको हालसम्मको अनुसन्धानबाट खुलेको छ ।
रकम हिनामिनाका सम्बन्धमा छलफल गर्न अस्पताल सञ्चालक समितिको बैठक गत कात्तिक ३ गते बसेको थियो । बैठकले लेखा परीक्षक मनोज अधिकारीलाई छानबिन गरेर प्रतिवेदन पेश गर्ने विज्ञका रूपमा नियुक्त गरेको थियो । कर्मचारीकै मिलेमतोमा अनियमितता गरिएको प्रतिवेदन तयार पारेर अधिकारीले कात्तिक १४ गते अस्पताललाई बुझाएका थिए ।
विराट मेडिकल कलेजका अध्यक्ष डा. ज्ञानेन्द्रमान सिंह कार्कीले कोभिड—१९ का बेला सबै मानिसमा त्रासको मौका छोपेर कर्मचारीहरुले बदमासी गर्न सुरु गरेको पाइएको छ । उनीहरुले बिरामीबाट डिपोजिट गरेको पैसा उपचार गरेर बाँकी रहेको वा उपचारमा लागेकै पैसा डिस्काउन्ट भन्दैं नक्कली युजर बनाएर अपचलन गरेका थिए ।
‘१२ बजे राति ११ लाख डिस्काउन्ट गरेको थाहा भएपछि शंका भयो’
-डा. ज्ञानेन्द्रमान सिंह कार्की
कोभिड—१९ को महामारीको समयमा मानिसहरुमा त्रासदी थियो । मरिन्छ, बाँचिन्छ भन्ने ठेगान थिएन । हामी बिरामीको उपचारमा मात्रै तल्लीन थियौं । त्यही मौका पारेर केही बदमास कर्मचारीले सफ्टवेयरको पासवर्ड चोरेछन् ।
आईटीमा परिवर्तन गर्न नसकेपनि नक्कली डिस्काउन्ट बनाएर बिरामीको डिपोजिटको रकम हिनामिना गर्न थालेछन् । १२ बजे राति ११ लाख डिस्काउन्ट गरेको पत्ता लागेपछि शंका उब्जियो । १२ बजे राति ११ लाख रुपैयाँ कसले डिपोजिट गर्छ र डिस्काउन्ट दिन्छ भनेर सोधखोज गर्दा बदमासी भएको थाहा पाएर प्रहरीलाई खबर गरियो ।
अहिले प्रहरीले अनुसन्धान गरिरहेको छ । हाम्रो एकाउण्ट सिधैं कर कार्यलयमा जोडिएको हुन्छ । यस्ता फटाइ अब हामीसँग मात्र जोडिएन्, करसँग पनि जोडियो । अब अनुसन्धानले सबै कुरा बाहिर ल्याउँछ ।
