विराटनगर—प्रदेश १ सरकार मातहतमा रहेको १६० शैय्याको ‘कोशी कोभिड—१९ उपचार केन्द्र’को नाम प्रदेश सरकारले परिवर्तन गरेको छ । शुक्रबार बसेको प्रदेश मन्त्रिपरिषद्को बैठकले अस्पतालको नाम ‘संक्रामक रोग तथा सघन उपचार केन्द्र’ राख्ने निर्णय गरेको हो ।
मन्त्रिपरिषद्को निर्णयअनुसार आइतबार प्रदेश मातहतमा रहेको अस्पतालको संक्रामक रोग तथा सघन उपचार केन्द्र नाम रहेको बोर्ड राखिएको स्वास्थ्य मन्त्रालय प्रदेश १ का सचिव अनुज भट्टचनले बताए । महामारीको रुपमा फैलिएको कोभिड—१९ संक्रमणको बेला प्रदेश १ सरकारले उक्त अस्पताल संचालनमा ल्याएको थियो ।
अस्पतालको नयाँ नाम संशोधन भएसँगै सरुवा रोग सम्बन्धी उपचार हुने डा. भट्टचनले बताए । ‘यसअघि कोभिड–१९ को मात्र उपचार हुने गरेको थियो,’ उनले भने, ‘अहिले सरुवा रोग सम्बन्धिका उपचार हुने गरेको छ ।’
अहिले डेंगु लागेका बिरामीको पनि उपचार हुने गरेको अस्पतालका संयोजक डा. कुशल वस्तीले जानकारी दिए । अहिले दैनिक अस्पतालमा ओपिडीमा १ सय जना बिरामीले स्वास्थ्य उपचार गर्दै आएका छन् । ‘भर्ना हुने खालका बिरामी अहिलेसम्म आएका छैनन्,’ उनले भने, ‘ओपिडीमा सामान्य लक्षण देखा परेका डेंगुका बिरामीहरू पनि आउने गरेका छन् ।’
अहिले अस्पतालमा कोभिड—१९ का दुई जना बिरामी उपचाररत छन् । यो अस्पतालमा ५९ जनाको अस्थायी दरबन्दी रहेको छ । जसमा मेडिकल अधिकृत र स्टाफ नर्सहरूको दरबन्दी छ । अस्पतालमा २० वटा भेन्टिलेटरसहितका १६० शैय्या रहेको छ । नयाँमा ७० र पुरानोमा ९० शैय्या छ । अस्पतालबाट ४ जना मेडिकल अधिकृत र १२ जना नर्सहरूले स्वास्थ्य सेवा प्रदान गर्दै आएका छन् ।
