विराटनगर–पूर्वी नेपालको सबैभन्दा ठूलो विराटनगरस्थित कोशी अस्पतालको एचडियु वार्ड बन्द भएको छ । अस्पतालमा कार्यरत करारका ३१ जना स्वास्थ्यकर्मीहरूको म्याद थप नगरेपछि अस्पतालको एचडियु वार्ड बन्द भएको हो ।
१९ जना मेडिकल अधिकृत र १२ जना स्टाफ नर्सहरूको स्वास्थ्य तथा जनसंख्या मन्त्रालयले करारको म्याद थप नगर्ने निर्णय गरेसँगै साउनदेखि कोशी अस्पतालको एचडियु वार्ड बन्द भएको हो ।
स्वास्थ्य तथा जनसंख्या मन्त्रालयको ३१ असारको सचिवस्तरीय निर्णयबाट कोभिड–१९ उपचार तथा व्यवस्थापनका लागि विगत वर्षहरुमा संचालनमा आएको ६ सय ४९ स्थानीय तहका कोभिड–१९ अस्थायी अस्पतालमा कार्यरत जनशक्तिको लागि चालु आर्थिक वर्षको १ साउनबाट पारिश्रमिक उपलब्ध नगराइने निर्णय गरेको थियो ।
मन्त्रालयले गरेको उक्त निर्णय कोशी अस्पतालले कार्यन्वयन गरेर लैजादा ३१ जना स्वास्थ्यकर्मी, ४ जना हेल्थ असिस्टेन्ट, २ जना स्वीपर, ४ जना कार्यालय सहयोगी र १ जना इलेक्ट्रिसियन गरी ४१ जनाको करारको म्याद थप भएको कोशी अस्पतालका सूचना अधिकारी रामप्रसाद नेपालले जानकारी दिए ।
मेडिकल अधिकृत र स्टाफ नर्सको करार म्याद थप नगरेपछि कोशी अस्पतालको आईसीयुसँगै रहेको १२ शैय्याको एचडियु वार्ड जनशक्ति अभावका कारण बन्द हुन पुगेको हो ।
कोशी अस्पतालको एचडीयु वार्ड बन्द भएपछि आर्थिक अवस्था विपन्न भएका बिरामी चर्को शुल्क बुझाएर निजी हस्पिटलमा उपचार गर्न बिरामी बाध्य भएका छन् । कोशी अस्पतालमा दैनिक १ हजार रुपैयाँ शुल्क तिरेपछि एचडियु वार्डमा सेवा लिन सक्छन् । त्यही एचडियूमा राखेर उपचार गरेको निजी हस्पिटलमा ३ देखि ६ हजार रुपैयाँसम्म दैनिक बुझाउनुपर्ने अवस्था छ ।
करार म्याद थप नभएपछि जनशक्ति अभावले बन्द भएको कोशी अस्पताल भित्रको एचडियु वार्ड । तस्बिर : अनिल श्रेष्ठ
‘सरकारको निर्णयले बिरामीले सास्ती पाएका छन् । अहिले अस्पतालको एचडियु वार्ड बन्द भएको छ । जसले गर्दा विपन्न बिरामीलाई आर्थिक भार बढाएर लगेको छ । आईसीयुमा राखेको बिरामीको स्वास्थ्य सुधार हुँदै गएपछि एचडियुमा राखेर उपचार गर्ने गरेका थियौं । अहिले एचडियु वार्ड बन्द भएकोले आईसीयूमै राखेर उपचार गरिनुपर्ने बाध्यता रहेको छ । जसले गर्दा यसको प्रत्यक्ष मार्का बिरामीलाई हुन जान्छ,’ कोशी अस्पतालको आईसीयु वार्डमा रहेर उपचार गर्ने एक चिकित्सकले भने, ‘एचडियु वार्डमा राखेर उपचार गर्नुपर्ने बिरामीलाई सोझै जनरल वार्डमा सार्न पनि मिल्दैन् । त्यहाँ बिरामीलाई आवश्यक पर्ने उपकरण हुँदैन । त्यसैले बिरामीको बसाइँ आईसीयुमा लम्बिने गरेको छ ।’
यसले बिरामीलाई आर्थिक भार बढन जानुका साथै आईसीयुमा राखेर उपचार गर्नुपर्ने नयाँ बिरामीले पालो पाउन नपाउँदा निजीमा चर्को शुल्क बुझाएर उपचार गर्न बाध्य हुनुपर्ने अवस्था सिर्जना भएको उनले बताए ।
करारका जनशक्तिका आधारमा कोशी अस्पतालले आईसीयु सेवा २४ शैय्यामा विस्तार गरेको थियो । १ साउनदेखि स्वास्थ्यकर्मीको करार म्याद थप नभएर उनीहरू आउन छोडेपछि अहिले घटेर १० शैय्यामा खुम्चाइएको छ । अस्पतालको आइसियुमा बिरामी दैनिकजसो भरिएपछि निजी हस्पिटलमा रेफर गर्नुपर्ने बाध्यता रहेको छ । ‘एचडियुमा राखेर उपचार गर्ने बिरामीलाई पनि अहिले आईसीयुमा राखिएको छ । यहाँको एचडियु वार्ड बन्द छ,’ आईसीयु वार्डको उपचारमा खटिएका चिकित्सकले भने ।
कोशी अस्पतालका मेसु डा. यज्ञराज खरेलले करारका स्वास्थ्यकर्मी र कर्मचारीहरूको करार म्याद थप नभएपछि जनशक्तिको अभाव भएको बताए । ‘स्वास्थ्यकर्मीहरूको अभाव भएकोले केही हदसम्म सेवा प्रवाहमा समस्या आएको छ,’ मेसु डा. खरेलले भने, ‘यस विषयमा हामीले स्वास्थ्य तथा जनसंख्या मन्त्रालयमा पत्राचार पनि गरी जानकारी गराएका छौं । अहिले भइरहेको सेवा प्रवाहको समस्या २ देखि तीन साता भित्रमा सहजता हुनेछ ।’
लोकसेवाले पनि परीक्षा लिइसकेकोले त्यहाँबाट आउने जनशक्ति र कोशी अस्पतालमा रिक्त रहेको जनशक्ति पदपूर्ति हुने मन्त्रालयबाट जानकारी आएकोले केही दिनभित्रमा सेवा प्रवाहमा सहजता आउने मेसु खरेलले बताए ।
कोशी अस्पतालको ओपीडीमा दैनिक ८ सयदेखि १ हजार जनासम्म बिरामी आउने गर्दछन् । जसमध्ये आईसीयुमा भर्ना गरेर उपचार गर्नुपर्ने एक दर्जन बिरामी आउने गरेको अस्पतालले जनाएको छ ।
