विराटनगर–देशका प्रमुख सहरहरूमा फोहोर व्यवस्थापन गर्न चुनौती बनिरहेको बेला विराटनगरस्थित कोशी अस्पतालमा उत्सर्जन हुने फोहोरबाट आम्दानी गर्न थालेको छ । शुक्रबार कोशी अस्पतालले फोहोर बिक्री गरेर पहिलो पटक ६ हजार रुपैयाँ आम्दानी गरेको छ ।
विगतमा अस्पतालमा उत्सर्जन हुने फोहोर त्यतिकै फाल्ने गरेकोमा त्यसबाट आम्दानी लिने गरी अस्पताल प्रशासनले व्यवस्थापन गरेपछि कमाइ हुन थालेको हो ।
अस्पतालको सुधारमा क्रियाशील रहेका मेडिकल सुपरिटेन्डेन्ट(मेसु) डा.यज्ञराज खरेलले अस्पतालबाट उत्सर्जन हुने फोहोरलाई छुट्याएर बिक्री योग्य वस्तु बिक्री गर्ने व्यवस्था मिलाएका हुन् ।
‘अस्पतालले फोहोर बेचेर पहिलो पटक आम्दानी गरेको छ । हामीले शुक्रबारमात्र ६ हजार रुपैयाँको फोहोर बिक्री ग¥यौं,’ उनले भने, ‘अब यसलाई निरन्तरता दिन्छौं ।’ फोहोर बिक्री गरेर मासिक एक लाख रुपैयाँसम्म आम्दानी हुन सक्ने अस्पतालको अनुमान छ ।
अस्पतालमा प्रयोग हुने स्लाइनका खाली बोतल, पाइप, सिरिन्ज, निडिलजस्ता वस्तु छुट्याएर बिक्री गरेको डा. खरेलले जानकारी दिएका छन् । अस्पतालमा उपचार गराउने बिरामी र कुरुवाहरुले प्रयोग गर्ने प्लाष्टिकजन्य वस्तु तथा बोतलहरुसमे संकलन गरेर अस्पतालले आम्दानी लिन थालेको हो । विगतमा अस्पतालबाट बोतललगायतका वस्तु कवाडी संकलन गर्नेहरुले लैजाने गरेका थिए । अब कवाडी संकलकहरुलाई प्रवेश गर्न रोक लगाएको अस्पताल प्रशासनले जनाएको छ ।
कोशी अस्पतालले प्रसुतिका क्रममा उत्सर्जन हुने फोहोर तथा सालनाल, शल्यक्रियाबाट निस्किने ट्युमर आदि वस्तुबाट जैविक ग्यास उत्पादन गरी लाभ लिदै आएको छ । अस्पतालबाट उत्सर्जन हुने फोहोर विसर्जनमा समस्या रहेको र सुरक्षित इन्सिनेरेटर नभएको बेला फोहोर बिक्री गरेर आम्दानी गर्ने उपाय प्रभावकारी हुने अस्पतालको बुझाइ छ ।
