विराटनगर–विराटनगरस्थित नोबेल मेडिकल कलेजले चिकित्सा शिक्षा आयोगले तोकेकोभन्दा बाहिर गएर विभिन्न शीर्षकमा अतिरिक्त शुल्क लिन थालेको छ । अतिरिक्त शुल्क नबुझाउने विद्यार्थीलाई कलेजले पठनपाठनमा रोक लगाउने गरेको छ ।
कलेजले भने अनुसारको अतिरिक्त शुल्क नुबझाउदा बिहीबार कलेज जान खोज्दा प्रशासनले सुरक्षा गार्ड र बाहिरी मानिसहरु परिचालन गरेर विद्यार्थीलाई कलेज प्रवेश रोक लगाएका हुन् ।
जिल्ला प्रशासन कार्यालय मोरङको निर्देशनमा ११ पुसदेखि पठनपाठन सञ्चालन गरेको कलेज प्रशासनले अतिरिक्त शुल्क नबुझाएको भन्दै बुधबारदेखि पठनपाठनमा रोक लगाएको थियो । कलेजले ११ पुसमा कक्षा सुरु गरेको तर १२ र १३ गते सुरक्षा गार्ड राखेर अतिरिक्त शुल्क बुझाएपछि मात्रै कक्षामा प्रवेश दिने विद्यार्थीलाई जानकारी गराएको थियो । तर, अभिभावकको आग्रहमा तीन दिन पढ्न दिएपनि बुधबारबाट अतिरिक्त शुल्क नबुझाउनेको पठनपाठन रोकेको हो ।
कलेजमा भर्ना भएका ९६ विद्यार्थीमध्ये ९ जना भारतीय, १० जना छात्रवृत्तिका र ५ जना अतिरिक्त शुल्क बुझाएका विद्यार्थीलाई छुट्टै कक्षा कोठामा राखेर पढाउन थालेको र आफूहरूको पठनपाठनमा रोक लगाएको विद्यार्थीहरूले गुनासो गरेका छन् ।
नोबेल डा. सुनिल शर्माको स्वामित्वमा रहेको मेडिकल कलेज हो । नेपाली कांग्रेसका नेतासमेत रहेका नोबेलका सञ्चालक डा. शर्माले आफूहरुबाट अनावश्यक शुल्क असुल्न खोजेको विद्यार्थी र अभिभावकको भनाइ छ । मुलुकको ऐन, नियम विपरित आफूहरुबाट शर्माले पैसा असुल्न खोजेको तर उनीविरुद्ध राज्यले कुनै एक्सन नलिएको भन्दै अभिभावकहरु आक्रोशित बनेका छन् ।
स्नात्तक तह (एमबीबीएस) पहिलो वर्षमा भर्ना हुन आएका विद्यार्थीहरुबाट कानुन विपरित अतिरिक्त शुल्क असुल्न खोजिरहेको नोबेलले शुल्क नबुझाउने विद्यार्थीलाई कक्षा प्रवेशमै रोक लगाएको हो । जिल्ला प्रशासन कार्यालय मोरङमा साताअघि भएको छलफलमा नोबेलले कुनै पनि अतिरिक्त शुल्क नदिने प्रतिबद्धता जनाएको थियो ।
प्रशासनकै रोहबरमा भएको छलफलमा कलेज व्यवस्थापनले शुल्क नलिने भनेपछि विद्यार्थी र अभिभावक ढुक्क बनेका थिए । तर, बुधबारदेखि सुरु भएको कक्षा प्रवेश गर्नु अघि शुल्क अनिवार्य बुझाउन कलेजले विद्यार्थीलाई ताकेता गरिरहेको छ । ‘प्रशासनसँग छलफलमा कलेज प्रशासनले अतिरिक्त कुनै पनि शुल्क नलिने भनेको थियो,’ एमबीबीएस अध्ययनका लागि नोबेलमा भर्ना भएका एक विद्यार्थीले हेल्थआवाजसँग भने ‘तर, शुल्क नबुझाएको भन्दै हामीलाई कक्षामा प्रवेश नै दिइएन । यो कलेजको असुली धन्दा जस्तो भयो ।’
‘अरुलाई अतिरिक्त शुल्क नबुझाएको भन्दै रोकिएको छ,’ ती विद्यार्थीले थपे ‘अस्पतालमा खटिएका सुरक्षागार्डसहितका व्यक्तिहरुले रोकेका हुन् ।’
विद्यार्थी र अभिभावकहरु भने चिकित्सा शिक्षा आयोगले तोकेकोबाहेकका कुनै पनि शुल्क नबुझाउने अडानमा छन् । नोबेलले एमबीबीएस भर्ना हुने विद्यार्थीबाट इन्टर्नसीप वापत २ लाख ४० हजार, विश्वविद्यालय सम्बन्धन शुल्क वापत ९८ हजार र होस्टल शुल्क १ लाख ४४ हजारलगायतका अन्य धेरै शुल्क बुझाउन विद्यार्थीलाई दबाब दिँदै आएको विद्यार्थीले बताएका छन् । चिकित्सा शिक्षा आयोगले तोकेभन्दा नोबेलले हरेक विद्यार्थीसँग ४ लाख ८२ हजार रुपैयाँ अतिरक्त शुल्क असुल्न खोजिरहेको छ ।
कलेजले लाखौं अतिरिक्त शुल्क नै तोकेर थप आर्थिक भार बोकाउने भएपछि विद्यार्थी र अभिभावकले जिल्ला प्रशासन मोरङमा अघिल्लो आइतबार ज्ञापन पत्र बुझाएका थिए । गत साताको सोमबार मोरङका प्रमुख जिल्ला अधिकारी काशीराज दाहालले नोबेल प्रशासनलाई छलफलमा बोलाएर अतिरिक्त शुल्क नलिन निर्देशन दिएका थिए । कलेज व्यवस्थापनका प्रतिनिधिहरुले अतिरिक्त शुल्क नलिने बताएका थिए ।
चिकित्सा शिक्षा आयोगले एमबीबीएसका लागि राजधानीबाहिर तोकेको जम्मा शुल्क ४४ लाख ३६ हजार २५ रुपैयाँ हो । पाँच वर्षे कोर्सको प्रथम वर्ष वापतको १४ लाख ८५ हजार रुपैयाँ विद्यार्थीले नोबेललाई बुझाइसकेका छन् । नोबेलले भने यसबाहेकका अन्य शुल्क नबुझाए कक्षा अघि नबढाउने भन्दै विद्यार्थीलाई निरन्तर दबाब दिइरहेको छ ।
बिहीबारसमेत कक्षामा विद्यार्थीलाई प्रवेश नदिएपछि अभिभावक र कलेज प्रशासनबीच छलफल भएको थियो । यद्यपि छलफलमा कलेजका प्रिन्सिपल डा. रामहरि घिमिरेले अतिरिक्त शुल्क बुझाउनैपर्ने अडान राखेको अभिभावकले बताएका छन् । ‘हामीले यो विषय किनारा नलागेसम्म कक्षा नचलाईदिन आग्रह ग¥यौं,’ छलफलमा सहभागी एक अभिभावकले भने ‘तर, उहाँहरु मान्नुभएन । उहाँहरु राज्यको नियम कानुनभन्दा माथि हो कि के हो ?’ शर्मा स्वामित्वको काठमाडौं मेडिकल कलेजमा पनि अतिरिक्त शुल्क असुल्न विद्यार्थीलाई दबाब दिइरहेको भन्दैं विवादमा तानिएको छ ।
