विराटनगर—बोइलर कुखुराको तौल बढाउन खुवाइने भिटामिन भारतबाट तस्करी भएर नेपाल आउने गरेको पाइएको छ । विराटनगरसहित पूर्वका एग्रीभेटका व्यापारीहरूले क्यारिङवाला प्रयोग गरेर भिटामिन भारतदेखि तस्करी गरेर ल्याउने गरेको पाइएको हो ।
सशस्त्र प्रहरी बल सीमा सुरक्षा पोष्ट बखरीले सोमबार राति विराटनगर –१६ दरैयास्थित केसेलिया खोलाबाट ठूलो परिमाणमा भिटामिन बरामद गरेपछि भारतदेखि तस्करी भएर आउने गरेको पुष्टि भएको छ । बिओपी बखरीका इन्चार्ज सशस्त्र प्रहरी निरीक्षक दिल बहादुर पन्तको नेतृत्वमा खटिएको प्रहरी टोलीले चारवटा साइकलमा भारतबाट नेपालतर्फ भित्र्याउँदै गरेको मल्टिसोल भिटामिन बरामद गरेको छ ।
प्रहरीले चार लाख १८ हजार ७ सय ६७ रुपैयाँ मुल्य बराबरको ७६७ बोतल मल्टिसोल भिटामिन बरामद गरेको छ । जसमा एक सय एमएलको ४३३ बोतल, २०० एमएलको १४८ बोतल र ५०० एमएलको १४८ बोतल छन् । ठूलो परिमाणमा नेपाल भित्र्याइएकोले भिटामिन ‘ए’ तथा ‘डी–३’ सिरफ ठूलै कारोबारीको हुनसक्ने आशंका गरिएको छ । तस्करीको भिटामिन ल्याउन व्यापारीले क्यारिङ गर्नेलाई जिम्मा दिने गरेका छन् । क्यारिङ गर्नेले निश्चित रकम व्यापारीसँग लिएपछि भरिया प्रयोग गरेर तस्करीको औषधी र भिटामिनहरू व्यापारीले भनेको गन्तब्यसम्म पु¥याउने जिम्मा लिने गर्दछन् । तस्करी भएर आएको भिटामिन विराटनगरका एग्रीभेटले मगाएको हुनसक्ने भएकोले प्रहरीले थप अनुसन्धान अगाडि बढाएको छ ।
कुखुरा हलक्क बढाउनका लागि खुवाउने यो मल्टिसोल अवैध रुपमा नेपाल भित्र्याइरहेको सूचनाका आधारमा सीमा सुरक्षा पोष्टले निगरानी गरेको थियो । ‘बरामद साइकल र भिटामिन विराटनगर भन्सार कार्यालयमा बुझाइएको छ,’ बिओपी बखरीका प्रमुख सशस्त्र प्रहरी निरीक्षक पन्तले भने । चोरी पैठारीमा संलग्नहरु प्रहरीलाई देख्नासाथ फरार भएको सशस्त्र प्रहरी बल मोरङका प्रमुख एसपी तीर्थ पौडेलले जानकारी दिए । ‘डियुटीमा खटिएकाहरूलाई देखेपछि तस्करीको भिटामिन ल्याउनेहरू फरार भए,’ उनले भने, ‘चोरी तस्करी नियन्त्रण गर्न सीमा नाकामा सुरक्षा प्रहरी परिचालन गरिएको छ ।’
प्रहरीले एकसय एमएलको मल्टिसोलको खरिद मूल्य १८५, २०० एमएलको ३६० र ५०० एमएलको ६९० भारतीय रुपैयाँ पर्ने जनाएको छ । उक्त भिटिामिन ६ देखि १५ दिन भएका कुखुराको तौल बढाउन यो खुवाउने गरिन्छ ।
