विराटनगर– विराटनगरको महेन्द्रचोकमा रहेको म्याक्स इन्टरनेशनल हस्पिटल एण्ड ट्रमा सेन्टरमा उपचारको क्रममा बिरामीको मृत्यु भएपछि अस्पताल तनाबग्रस्त बनेको छ । मोरङको जहदा गाउँपालिका ४ की २५ वर्षिय रन्जना महतोको उपचारको क्रममा शनिबार विहान मृत्यु भएसँगै बिरामीका आफन्तहरुले चिकित्सकको लापरवाहीका कारण मृत्यु भएको भन्दै नाराबाजी गरिरहेका छन् ।
बिरामीका आफन्तले चिकित्सकको लापरवाहीका कारण मृत्यु भएको भन्दै अस्पताल अगाडि शनिबार दिउँसो नाराबाजी गर्दै आएका छन् । उनीहरूले लापरवाही गर्ने चिकित्सकलाई कारवाही गर्नुको साथै पीडित परिवारलाई क्षतिपूर्ति दिनुपर्ने माग राख्दै अस्पताल अगाडि नाराबाजीमा उत्रेका छन् । मृतकका आफन्तले नाराबाजी गर्दै प्रदर्शनमा उत्रिएपछि अस्पताल अगाडी मोरङ प्रहरीले ठूलो संख्यामा प्रहरी परिचालन गरेर सुरक्षा दिएको छ ।
गत पुस १६ गते रन्जनाले खाना पकाउने क्रममा शरिरको विभिन्न भाग जलेको थियो । उनलाई तत्काल उपचारका लागि विराटनगरस्थित कोशी अस्पताल लगिएको थियो । कोशीमा उपचार नहुने भएपछि धरानस्थित विपी कोइराला विज्ञान प्रतिष्ठान रेफर गरिदिएको भएपनि एम्बुलेन्स चालकले म्याक्स हस्पिटल लिएर आएको बिरामीका देवर विरेन महतोले जानकारी दिए । कमिसन पाउने चक्करमा एम्बुलेन्स चालकले म्याक्स पु¥याएको उनीहरुको आरोप छ ।
‘अस्पतालमा करिब डेढ महिना उपचार ग¥यौं । अहिलेसम्म १२ लाख रुपैयाँ सकियो । तर, भाउजुको स्वास्थ्यमा कुनै सुधार आएन,’ विरेनले भने, ‘भाउजुको उपचार १७ धुर जग्गा बेचेर र चन्दा संकलन गरेर उपचार गरेका थियौं । हस्पिटल र चिकित्सकको लापरबाहीले बचाउन सकेनौं ।’ शुक्रबार दिउँसोसम्म राम्रोसँग बोलेको भाउजुको शनिबार बिहान मृत्यु भएको हस्पिटलका कर्मचारीले जानकारी दिएको उनले बताए ।
लापरवाही गर्ने चिकित्सकलाई कारवाही नभएसम्म शव नबुझ्ने उनीहरुले अडान राखेका छन् । मृतकको चार वर्षको छोरी र २ वर्षको छोरा छ । यता हस्पिटल प्रशासनले विरामीको मृत्युको विषयमा कुनै जानकारी गराएको छैन । घटनाको विषयमा हेल्थ आवजले सम्पर्क गर्दा अस्पताल प्रशासनका कर्मचारी सम्पर्कमा आउन चाहेनन् ।
