विराटनगर– भारतबाट प्रतिबन्धित औषधी तस्कर गरी ल्याएको आरोपमा पक्राउ परेका एक जना आरोपीलाई औषधी व्यवस्था विभाग विराटनगरले बोलाएको बेलामा उपस्थित हुने गरि हाजिर जमानतमा छोडेको छ ।
प्रतिबन्धित औषधीसहित पक्राउ परेका विराटनगर– १३ का ३६ वर्षिय नरेश यादवलाई विभागले आइतबार हाजिर जमानतमा छोडेको हो ।
मोरङ प्रहरीबाट खटिएको टोलीले प्रतिबन्धित चार कार्टुन औषधीसहित ८ मंसिरमा यादवलाई पक्राउ गरेको थियो । सिआरबी जतुवाको टोलीले यादवको घरमा भण्डारण गरिएको अवस्थामा ‘रम्डेसिभिर’ इन्जेक्सनसहितका औषधी व्यवस्था विभागमा दर्ता नभएका प्रतिबन्धित औषधीहरू बरामद भएको थियो ।
उनको घरबाट औषधी बरामद भएपछि यादवलाई प्रहरीले पक्राउ गरि आवश्यक कारवाहीको लागि ९ मंसिरमा औषधी व्यवस्था विभाग विराटनगरलाई बुुझाएको थियो । प्रहरीले बुझाए लगत्तै विभागले ९ मंसिरमा पक्राउ परेका यादवलाई मोरङ अदालतमा ‘प्रतिबन्धित औषधि पैठारी तथा ओसारपसार’ मुद्धामा पाँच दिनको म्याद थप गरि अनुसन्धान सुरू गरेको थियो ।
विभागका प्रमुखसहितका कर्मचारीहरूलाई संघिय संसदसहितका केही नेता र व्यवसायीहरूले दवाब दिएपछि यादवलाई अदालतमा उपस्थित भएको बखत उपस्थित गराउने सर्तमा छोडेको स्रोतको दाबी छ ।
आरोपी यादवलाई छुटाउन तस्करीमा संलग्न गिरोहको प्रभावमा परेर नेकपाका एक केन्द्रीय तहका नेता र केही व्यवसायी लागि परेका थिए । यद्यपि मोरङ प्रहरीले दबावको विच पनि ओरोपीलाई आवश्यक कारबाहीको लागि औषधी व्यवस्था विभागलाई बुझाएको थियो ।
प्रतिबन्धित औषधी सम्बन्धी मुद्धा औषधि व्यवस्था विभागले अनुसन्धान गरी सरकारी वकिलको कार्यालयमार्फत अदालतमा अभियोग दर्ता गर्दछ । तर, यसरी आरोपलाई हाजिर जमानतमा छोडेर विभागले अनुसन्धान नगर्दा प्रतिवादीले प्रमाण लोप गराउन सक्ने कानून व्यवसायीहरु बताउँछन् ।
यता औषधी व्यवस्था विभाग विराटनगरले यस घटनामा अुसन्धान भइरहेकाले मुख्य व्यक्तिलाई पक्राउ गर्न प्रतिवादीलाई बोलाएको बेला उपस्थित हुने गरि हाजिर जमानतमा छोडेको जानकारी दिएको छ । अहिले नै यो मुद्धा टुंगोमा नपुगेकोले अनुसन्धान अधिकृतले अनुसन्धान गर्दै आएको औषधि व्यवस्था विभाग विराटनगरका प्रमुख संजिव शर्मा कट्टेलले जानकारी दिए ।
‘कसुर गरेका व्यक्तिलाई कसैको दवाबमा प्रतिवादीलाई छोड्न सकिदैन,’ उनले भने, ‘अहिले अनुसन्धान भइरहेको छ । अनुसन्धान प्रक्रिया रहेको विषय पुरा नभइ केही भन्न मिल्दैन ।’
औषधि मगाउने फरार
भारतदेखि तस्करी गरी विराटनगरसम्म प्रतिबन्धित औषधी ल्याउने यादवले निश्चित रकम पाउँथे । कति रकम यादवले पाउँथे त्यो अहिले नै खुलेको छैन । प्रतिबन्धित औषधि मगाउने व्यक्त फरार छन् ।
विभागले ती व्यक्तिलाई पक्राउ गर्न मोरङ प्रहरीलाई पत्राचार गर्दा पनि अहिलेसम्म पक्राउ परेका छैनन् । यादवलाई अवैध औषधि मगाउने स्वास्थ्य क्षेत्रमा व्यक्ति रहेको औषधि विभागको अनुसन्धानबाट खुलेको छ । उनी ग्रामिण क्षेत्रमा बसोवास गरी विराटनगरसहितका अन्य स्वास्थ्य क्षेत्रको हब भएको ठाउँमा प्रतिबन्धित औषधि कारोबार गर्ने यस क्षेत्रका जानकारहरू बताउँछन् । प्रहरीले तस्करीको औषधी मगाउने व्यक्ति पक्राउ गरि नसकेकाले ती व्यक्तिको नाम गोप्य राखेको छ ।
८ मंसिरमा मोरङ प्रहरीले विराटनगर– १३ सैनिक टोलका नरेश यादवको घरबाट १० भाइल रेम्डेसिभिर इन्जेक्सन, औषधी व्यवस्था विभागमा दर्ता नभएका चार कार्टुन औषधि बरामद गरेको थियो । बरामद गरेको रेम्डेसिभिर इन्जेक्सन भारतमा भारु २ हजार ८ सय र ४ हजार ५ सय रुपैयाँमा पाइने यो इन्जेक्सन नेपालमा ल्याउँदा १५ हजारदेखि २५ हजार रुपैयाँसम्ममा खरिदबिक्री हुने गरेको छ ।
यसको तस्करी गरी कालोबजारीमा स्वास्थ्य क्षेत्रका केही समूहको संलग्न हुने गरेको देखिएको छ । स्रोतका अनुसार रेम्डेसिभिरको तस्करीमा विराटनगरका केही ठूला औषधि व्यवसायी र स्वास्थ्य क्षेत्रका जानकार व्यक्तिको संलग्न छ ।
