विराटनगर – विराटनगरस्थित नोबेल शिक्षण अस्पतालमा स्त्रीजन्य यौनाङ्ग सम्बन्धि सबै किसिमका क्यान्सरको शल्यक्रिया सुरू भएको छ ।नोबेलले स्त्रीरोग सम्बन्धि सबै किसिमका शल्यक्रियासहित स्त्रीजन्य प्रजनन् अंगहरुमा हुने क्यान्सरको पनि अप्रेशन हुन थालेको हो ।
सम्पूर्ण स्त्री रोगको उपचारका लागि नोवेलले विशेषज्ञ चिकित्सकको व्यवस्था मिलाएको छ । २६ बर्ष अघिदेखि विभिन्न सरकारी अस्पतालमा स्त्रीरोग विशेषज्ञको रुपमा कार्यरत वरिष्ठ डा.गेहनाथ बराललाई पनि नोबेलले भित्र्याएको छ । डा. बरालसहित नोबेलका बरिष्ठ स्त्रीरोग विशेषज्ञ डा.शान्ति सुवेदीसहितको टिमले सबै किसिमका स्त्रीरोगको उपचार गर्दै आएका छन् ।
सम्पूर्ण स्त्रीरोगको उपचार तथा अप्रेशनसहित स्त्रीजन्य सबै किसिमका क्यान्सरको पनि अप्रेशन थालिएको नोबेलका स्त्रीरोग विशेषज्ञ डा. गेहनाथ बरालले जानकारी दिए । ‘नोबेलमा पहिले पनि धेरै किसिमका स्त्रीजन्य समस्याको उपचार र अप्रशन हुदै आएको थियो, ’उनले भने, ‘ अब सबै किसिमका स्त्रीजन्य समस्याको उपचार अप्रेशनसहित स्त्रीजन्य यौनाङ्गहरुमा हुने क्यान्सरको पनि अप्रेशन थालेका छौ ।’
डा. बरालका अनुसार आङ खस्ने, पिसाब चुहिने तथा फिस्टुला लगायत रोगको अप्रेशनसहित पाठेघर तथा सबै स्त्रीरोग क्यान्सरको अप्रेशन पनि सुरु गरिएको हो । गुणस्तरीय र सर्वसुलभ उपचार सेवालाई प्राथमिकता दिदै आएको नोबेलले स्तरीय चिकित्सक र अत्याधुनिक उपकरणको व्यवस्था मिलाएर जटिल तथा दुर्लभ उपचार पनि सफलतापूर्वक गर्दै आएको छ ।
