बुटवल-मिर्गौला बिरामीका लागि आवश्यक पर्ने डाइलाइसिस सेवा लुम्बिनी प्रादेशिक अस्पतालले दिन सुरु गरेको छ । अस्पतालले बुटबलमा सोमबारदेखि डाइलाइसिस सेवाको सुभारम्भ गरेको हो ।
डायलाइसिस सेवाको एक कार्यक्रमबीच प्रदेश ५ का सामाजिक विकास मन्त्री सुदर्शन बरालले सुरुवात गरे ।
मिर्गौला बिरामीहरुले अनिवार्य रुपमा डाइलाइसिस गर्नुपर्ने हुन्छ । प्रदेशकै महत्वपूर्ण अस्पतालका रुपमा रहेको लुम्बिनी अस्पतालमा सेवा नहुँदा बिरामीहरु निजी क्षेत्रमा महंगोमा उपचार गर्न बाध्य थिए ।
मिर्गौलाको उपचार निकै महंगो हुने गरेको पीडितहरुले गुनासो गर्ने गर्दछन् । सरकारले निःशुल्क डाइलाइसिस सेवा दिने भने पनि पूर्णतया कार्यन्वयन भने हुन सकेको छैन् । बिरामीहरु अस्पताल आउनुपूर्व नै मिर्गौला सम्बन्धी जनचेतना जगाउन आवश्यक हुने चिकित्सकहरु बताउँछन् ।
‘लुम्बिनी प्रादेशीक अस्पतालमा सेवा थप गर्दे लैजाने योजना अनुरुप काम भैरहेको छ,’ प्रदेश ५ का सकाजिक विकास मन्त्री बरालले भने, ‘यसै वर्ष अस्पतालमा न्युरो सेवा विस्तार हुनेछ । त्यति मात्र होइन अब प्रादेशिक अस्पतालमा सबै सेवाको निरन्तरता जरुरी भैसकेको छ ।’
प्रदेशमै उपचारका लागि आशा र भरोसा लुम्बिनी अस्पतालमा भएपनि आशाा अनुरुपको सेवा नहुँदा सेवाग्राही असन्तुष्टी पोख्ने गरेका छन् । अस्पतालमा जनताले अनुभूति गर्ने गरी परिवर्तन आउने गरी काम गर्ने लुम्विनी प्रादेशिक अस्पताल प्रमुख डा. राजेन्द्र खनाल बताउँछन् । ‘यस क्षेत्रको आशाको केन्द्रविन्दु अस्पताल भनेकै लुम्बिनी अस्पताल हो । यहाँको सेवाका बारेमा सबैलाई सुसूचित गर्ने दायित्वसमेत हामीसँग छ,’ उनले भने, ‘अस्पतालको सेवामा कुनै कमी हुन नदिने गरी हामी काम गरिरहेका छौं ।’
लुम्बिनी प्रादेशिक अस्पतालमा अहिले ४ बेडबाट डायलाइसिस सेवा सुरु भएको छ । यस क्षेत्रमा बिरामीको संख्या अत्याधिक सबैलाई सेवा प्राप्त गर्न भने गाह्रो पर्ने देखिएको छ । डायलाइसिस सेवालाई आवश्यकताअनुसार थप गर्दे लैजाने अस्पतालका हेमोडायलाइसिस विभागका प्रमुख डा. शक्ति बस्नेत बताउँछन् । ‘बिरामीको भार अनुरुप थप गर्दै जाने योजनाका साथ सुरु गरेका छौं,’ उनले भने ।
