दाङ—दाङको राप्ती स्वास्थ्य विज्ञान प्रतिष्ठानमा युरोलोजी सेवालाई थप प्रभावकारी बनाउन नयाँ अत्याधुनिक मेसिन जडान गरिएको छ । लुम्बिनी प्रदेशको स्वास्थ्य मन्त्रालयले अनुदानका रुपमा सहयोग स्वरुप प्रतिष्ठानलाई अहिलेको नयाँ प्रविधीका रुपमा थुलियम मेसिन प्रदान गरेको हो ।
लुम्बिनी प्रदेशका स्वास्थ्यमन्त्री राजु खनाल र प्रदेश स्वास्थ्य सचिव डा. जनार्दन पन्थीले संयुक्त रुपमा प्रतिष्ठानका उपकुलपति डा. विकास लामिछाने र रजिष्ट्रार प्राध्यापक श्याम लम्साललाई मेसिन हस्तान्तरण गरेका हुन्। मेसिन देशका सिमित अस्पतालहरूमा मात्र रहेको र अब लुम्बिनी प्रदेशका जनताले युरोलोजी सेवा लिन काठमाडौं धाउनुपर्ने अवस्थाको अन्त्य हुने रजिस्ट्रार प्राध्यापक श्याम लम्सालले बताए ।
युरोलोजी सेवालाई व्यवस्थित, सुरक्षित, प्रभावकारी बनाउन यो मेसिन प्रदेश स्वास्थ्य मन्त्रालयको सहयोगमा प्रतिष्ठानमा थप गरिएको युरोलोजिष्ट डा. प्रवोध रेग्मीले बताए । यो मेसिन जडान भएर संचालनमा आइसकेको छ । मेसिनको सहायतामा किड्नी, नली र पिसाब थैलीको पत्थरी फुटाल्न, प्रोष्टेडको ग्रन्थी र क्यान्सरको जोखिम भएको मासु निकाल्न पनि सकिनेछ ।
युरोलोजिष्ट डा. रेग्मीले सन २०१९ देखि यो मेसिन विश्वमा प्रयोग भएको जानकारी दिदै छिटो छरितो ढङ्गबाट मिर्गौलामा भएका हरेक किसिमका ढुङ्गा फुटाउन सकिने बताए । उनले अरुभन्दा धेरै राम्रो शक्तिशाली मेसिन प्रतिष्ठानमा आएको भन्दै अन्य मेसिनभन्दा यो धेरै प्रभावकारी रहेको पनि जानकारी दिए । उनले मेसिन जोडिएसँगै युरोलोजी सेवा लिन अब अन्यत्र जानु नपर्ने भन्दै सबै सुविधा प्रतिष्ठानमा रहेको पनि बताए।
मुलुकका ५ वटा अस्पतालमा मात्रै थुलियम मेसिन जडान गरिएको भन्दै डा. रेग्मीले वीर अस्पताल, विपी कोइराला स्वास्थ्य विज्ञान प्रतिष्ठान अहिलेसम्म नरहेको सेवा दाङबाट दिन थालिएको पनि बताए । साथै, उनले यो मेसिनबाट बिरामीको अप्रेसन सुरक्षित, भरपर्दो र विश्वासिलो रहेको पनि उल्लेख गरे।
डा. रेग्मीका अनुसार प्रतिष्ठानमा युरोलोजी सेवाअन्तर्गत हालसम्म ३ सय साना तथा ठूलो अप्रेसन गरिएको र सबै अप्रेसनहरु सफल भएका छन ।
