नेपालगन्ज—जाजरकोट भूकम्पमा घाइते भएका ३९ जनालाई बाँकेको नेपालगन्जस्थित भेरी अस्पतालमा ल्याइएको छ । घाइतेमध्ये ३७ जनाको डेडिकेटेड अस्पताल बनाइएको भेरी अस्पताल उपचार भइरहेको छ ।
१ जनाको कोहलपुर मेडिकल कलेजमा उपचार भइरहेको बाँकेका प्रमुख जिल्ला अधिकारी श्रवणकुमार पोखरेलले जानकारी दिए । बाँके ल्याइएका एक जनाको भने उपचारका लागि अस्पताल ल्याउने क्रममा बाटोमै मृत्यु भएको थियो ।
प्रजिअ पोखरेलकाअनुसार कोहलपुर मेडिकल कलेजमा उपचार भइरहेको १ जना घाइतेलाई पनि आजै डेडिकेटेड अस्पताल भेरीमै ल्याउने तयारी गरिएको छ ।
उपचाररत घाइतेमध्ये ५ जनाको राति १२ बजे नै चिकित्सकहरुले सफल अपरेसन गरेका छन् । ‘हाल सबै गरी ३८ जना भूकम्पका घाइतेको बाँकेमा उपचार भइरहेको छ,’ पोखरेलले भने, ‘भेरी ३७ जना कोहलपुर १ जना घाइते उपचाररत छन् । बिरामीको अवस्था सुधारोन्मुख र खतरामुक्त छ ।’
अस्पताल आइपुग्नुअघि नै मृत्यु भइसकेका १ जनाको शव आइतबार बिहान ७ बजे नलगाड—१, जाजरकोट पठाउने व्यवस्था मिलाइएको उनले जानकारी दिए ।
उपचाररत ३२ जनामध्ये १६ जना महिला र १६ जना पुरुष रहेको प्रकोप व्यवस्थापन टिमका फोकल पर्सन नरेश श्रेष्ठले जानकारी दिए ।
जसमध्ये, ९ जना बालबालिका, १ जना गर्भवती महिला र ५ जना ज्येष्ठ नागरिक रहेका छन् । उपचारका लागि नेपालगन्ज ल्याइएका घाइते बिरामीमध्ये १ जना बाँकेका, २३ जना जाजरकोटको, १३ जना रुकुमपश्चिमको र १ जना सल्यानका छन् ।
