नेपालगन्ज—नेपालगन्ज उपमहानगरपालिकाले नगरवासीका लागि निःशुल्क एम्बुलेन्स सेवा दिन सुरु गरेको छ । समयमै अस्पताल जान नपाएर अकालमा ज्यान गुमाउनुपर्ने अवस्थाको अन्त्य गर्ने उद्देश्यले नेपालगन्ज उपमहानगरपालिकाले वासिन्दाहरुका लागि निःशुल्क एम्बुलेन्स सेवा दिन सुरु गरेको हो ।
नेपालगन्ज उपमहानगरपालिकाका २३ वटा वडामध्ये १० वटा वडा मुख्य सहरी क्षेत्रभन्दा अलि टाढा छन् । ती क्षेत्रमा अझै पनि स्वास्थ्य सचेतनाको अवस्था नाजुक छ । ती क्षेत्रमा बसोवास गर्ने गर्भवती, अपांग, अशक्त, जेष्ठ नागरिकलगायत एम्बुलेन्स सेवाबाट लाभान्वित हुनेछन् ।
नगरवासीलाई निःशुल्क एम्बुलेन्स सेवा दिन उपमहानगरपालिकाले तीनदेखि पाँच वटा एम्बुलेन्स २४ घण्टा उपलब्ध गराउनेछ । निःशुल्क एम्बुलेन्स सेवा प्रदान गर्न नेपालगन्ज उपमहानगरपालिकाले एम्बुलेन्स सेवा प्रदायकहरुलाई मासिक एक लाख रुपैयाँ उपलब्ध गराउने भएको छ ।
संविधानले नागरिकलाई आधारभूत तहको स्वास्थ्य सेवा प्रत्याभूति गरेकाले त्यही व्यवस्थाअनुरुप एम्बुलेन्स सेवा निःशुल्क गर्न लागिएको हो । निःशुल्क संचालन हुने एम्बुलेन्समा अक्सिजनलगायत अत्यावश्यक स्वास्थ्य सामाग्री र तालिम प्राप्त चालकहरुको ब्यवस्था छ ।
निःशुल्क एम्बुलेन्स सेवाले प्रसुति व्यथा लागेपनि समयमै अस्पताल पुग्न नसक्दा गर्भवती र नवजात शिशुको मृत्यु हुने बिडम्बनापूर्ण अवस्थामा सुधार ल्याउने नेपालगन्ज उपमहानगरपालिका स्वास्थ्य शाखाका प्रमुख रामबहादुर चन्दले बताए ।
एम्बुलेन्स सेवा संचालन भएपछि आपत्तकालीन अवस्थामा उपचारका लागि अस्पताल पुग्नुपर्ने गर्भवती, सुत्केरी, गरिब, विपन्न, जेष्ठ नागरिक र अपांगता भएका व्यक्तिहरु लाभान्वित हुने नेपालगन्ज उप महानगरपालिकाका मेयर प्रशान्त विष्टले बताए ।
