नेपालगन्ज—नेपालगन्जमा फैलिएको दादुरा महामारीबाट संक्रमित हुने बालबालिकाको संख्या ९० पुगेको छ । नेपालगन्ज उपमहानगरपालिकाका २३ वटा वडा मध्ये ११ वटा वडामा दादुरा महामारी फैलिसकेको छ । सोमबार मात्रै १४ जना संक्रमित थपिएका छन् ।
पुस १२ गतेबाट देखिएको दादुरा संक्रमणबाट नेपालगञ्ज उपमहानगरपालिकाका वडा नं. १, २, ५, ७, ८, ९, १०, ११, १४, १५ र २२ मा गरी ९० जनामा संक्रमण देखिएको नेपालगञ्ज उपमहानगरपालिकाका स्वास्थ्य महाशाखा प्रमुख रामबहादुर चन्दले बताए ।
दादुराको संक्रमणबाट ५ नम्बर वडाका ३१ महिने एक बालकको मृत्यु भइसकेको छ । दादुराबाट संक्रमित नेपालगन्ज–५ का ३ वर्षीया बालिकालाई उपचारका लागि भेरी अस्पतालमा भर्ना गरिएको छ । संक्रमित भएका तर स्वास्थ्य अवस्था सामान्य भएका बालबालिकाहरु होम आइसोलेसनमा छन् । उनीहरुको स्वास्थ्य अवस्थाका बारेमा सम्बन्धित वडाको स्वास्थ्य संस्थामा कार्यरत स्वास्थ्यकर्मीले नियमित रुपमा अपडेट लिइरहेका छन् ।
बढी संक्रमित तीन वटा वडाबाट सुरु गरिएको दादुरा रुबेलाविरुद्धको खोप अभियान आजदेखि थप ८ वटा वडामा सुरु गरिएको छ । हालसम्म करिब २ हजार १ सय बालबालिकालाई दादुरा विरुद्ध खोप दिइसकेको स्वास्थ्य शाखा प्रमुख चन्दले बताए ।
खजुरामा पनि भेटिए दादुरा संक्रमित
नेपालगन्जसँगै जोडिएको बाँकेको खजुरा गाउँपालिकामा पनि दादुराको संक्रमित भेटिएका छन् । खजुरा गाउँपालिका वडा नम्बर २ गुरासपुरका २ जना बालकमा दादुरा संक्रमण भेटिएको स्वास्थ्य कार्यालय बाँकेका अधिकृत नरेशबाबु श्रेष्ठले बताए ।
दादुरा तीव्र गतिमा फैलिन थालेसँगै नियन्त्रणका लागि स्वास्थ्य कार्यलयले संक्रमितहरुको खोज तलाससँगै खोप र उपचारको ब्यवस्था मिलाएको छ । कोभिड—१९ महामारीका बेला दादुराको खोप लगाउन नपाएका बालबालिकाहरुमा संक्रमण देखिएको स्वास्थ्यकर्मीहरुले बताएका छन् ।
