काठमाडौं—स्वास्थ्य तथा जनसंख्या मन्त्रालयले नेपालगन्जस्थित भेरी अस्पतालको मेडिकल सुपरिटेन्डेन्ट (मेसु)मा डा. बद्री चापागाईलाई नियुक्त गरेको छ । शुक्रबार स्वास्थ्य तथा जनसंख्या मन्त्री भवानी खापुङले मन्त्रीस्तरीय निर्णय गर्दै डा. चापागाईलाई भेरीको नेतृत्व दिएका हुन् ।
लामो समयदेखि बाँकेको भेरी अस्पतालमा रमाएका डा. बद्री अहिले ठ्याक्कै ४० वर्ष ७ महिनाका भए । डर्माटोलोजी, लेप्रोलोजिष्ट, भेनरल डिजिजका प्रमुख कन्सल्ट्यान्ट रुपमा सक्रिय डा. चापागाईले वि.सं. २०६३ फागुनबाट सरकारी सेवामा प्रवेश गरेका हुन् ।
वि.सं. २०७३ साउन ५ गते ११ औं तहमा बढुवा भएका हुन्, उनी । उनले ११ औं तहको नियुक्ति लिँदा ३४ वर्ष ६ महिनाका थिए ।
वि.सं. २०३८ साल पुसमा पर्वत कुर्घामा जन्मिएका हुन्—डा. चापागाई । काठमाडौंको स्वर्णिम शिक्षा सदनबाट उनले वि.सं. २०५३ सालमा एसएलसी उत्तीर्ण गरेका हुन् । पछिल्लो ९ वर्षदेखि भेरी अस्पतालमा कार्यरत डा. चापागाईले राष्ट्रिय चिकित्सा विज्ञान प्रतिष्ठान (न्याम्स)बाट एमडी र विपी कोइराला स्वास्थ्य विज्ञान प्रतिष्ठान धरानबाट एमबीबीएस गरेका हुन् ।
सानैदेखि बिरामीको सेवा गर्ने हुटहुटीले चिकित्सक बनेका उनी अहिलेको नेपालको स्वास्थ्यको वर्किङ कल्चर र केही नीतिगत कुराहरुमा पुनःसंचरना गर्नुपर्ने धारणा राख्छन् । ‘म व्यक्तिगत रुपमा आफ्नो सेवाबाट सन्तुष्ट छु,’ केही समयअघि हेल्थआवाजसँगको कुराकानीमा उनले भनेका थिए, ‘तर, यही रुपमा हाम्रो स्वास्थ्य संरचना अगाडि बढ्न सक्तैन । त्यसैले वर्किङ कल्चर र केही नीतिगत कुराहरुमा पुनःसंरचना आवश्यक छ ।’
यी चिकित्सक आफूलाई बिरामीको सेवामा रहँदा सबैभन्दा बढी आनन्द प्राप्त हुने धारणा व्यक्त गर्छन् । भन्छन्, ‘बिरामीको सेवा गर्न पाउँदा मनै रमाउँछ ।’ डा. चापागाईको सरकारी सेवामा १५ वर्ष पुगेको छ । यो अवधिमा उनले दैलेख, जुम्ला, पाल्पा, मुगुलगायतका जिल्लामा काम गरिसकेका छन् । उनी वि.सं. २०९८ साल पुसमा सेवाबाट अवकास पाउनेछन् ।
