बुटवल–बुटवल क्षेत्रलाई स्वास्थ्य सेवाको हबको रुपमा विकास गर्न सकिने अवधारणमाथि छलफल भएको छ । बुटवल मोफसलको राजधानीका रुपमा विकास हुँदै आएको भएपनि स्वास्थ्य क्षेत्रमा भने सुविधाजन्य सेवा दिने क्षेत्रका रुपमा परिचय बनाउन सकेको छैन ।
बुटवलमा जटिल प्रकारका स्वास्थ्य समस्या देखिएमा ती समस्या समाधानका लागि काम गर्न सक्ने अवस्था नरहेको चिकित्सकहरु नै बताउँछन् । ‘बुटवलमा स्वास्थ्यका क्षेत्रमा धेरै कामहरु भएका छन् । यद्यपि जुन रुपमा विकास हुनुपर्ने हो । त्यो रुपमा भएको छैन,’ डा. सन्तोष भुसाल भन्छन्, ‘कुनै जटिल केस आएमा विकल्प खोज्नुपर्ने बाध्यता बुटवलमा छ ।’
बुटवलमा प्रायः जटिल रोगसँग सम्बन्धित विशेषज्ञ चिकित्सकहरुको अभाव हुने गरेको गुनासो आउने गर्दछ । कतिपय अवस्थामा विशेषज्ञ सेवा दिन समस्या हुने गरेको अस्पताल संचालकहरु बताउँछन् ।
बुटवल क्षेत्रमा बिरामी पत्ता लगाउन प्रयोग गरिने उपकरण वा उपचारका लागि चाहिने आधुनिक उपकरणहरुको समेत अभाव देखिएको सेवाग्राहीहरुको गुनासो छ । जसका कारण पनि उपचारका लागि बाहिर जानुपर्ने बाध्यता रहेको छ ।
उपचारका लागि बुटवल बाहिर जानुनपर्ने गरी स्वास्थ्य संस्थाहरुलाई थप आधुनिकीकरण र प्रविधियुक्त बनाउनुपर्नेमा डा. मुक्तिराम श्रेष्ठ जोड दिन्छन् । ‘हब बनाउने भनेर मात्र हुँदैन् । प्रविधि र विशेषज्ञता चाहिन्छ । सोहीअनुरुप काम गर्नुपर्ने आवश्यकता छ,’ उनले भने ।
बुटवलको स्वास्थ्य क्षेत्रलाई बृहत बनाउन सार्वजनिक स्वास्थ्य संस्थाको सेवा प्रवाह जनमुखी हुनुपर्नेमा सेवाग्रही जोड दिन्छन् । ‘गाउँबाट बिरामी भएर आउनेहरुको उपचार सहज हुनुपर्छ । त्यसका लागि यहाँका सरकारी अस्पतालहरु व्यवस्थित हुनुपर्यो’, तिलोत्तमा ३ रुपन्देहीका शोभाखर भण्डारी भन्छन्, ‘तब मात्र बुटवलमा स्वास्थ्यमा राम्रो प्रगति होला ।’
