बुटवल–लुम्बिनी प्रदेशका स्थानीय तहहरुले कोभिड–१९ विरुद्धको पूर्ण खोप पालिका घोषणाका लागि भन्दै ‘खोज र खोप लगाउ’ अभियान तीव्र बनाएका छन् । लुम्बिनी प्रदेशका अधिवकांश जिल्लाअन्तर्गतका पालिकाहरूले खोप अभियानलाई तीब्रता दिएका हुन् ।
रूपन्देहीको तिलोत्तमा नगरपालिका, सैनामैना नगरपालिका, ओमसतिया गाउँपालिकालगायतले अभियान सुरु गरिसकेका छन् भने अन्य पालिकाहरुले पनि अभियान संचालनको तयारी गरिरहेका छन् । त्यस्तै, पहाडी जिल्ला अर्घाखाँची, गुल्मी, पाल्पामा पनि अभियान सुरु भएको छ ।
अभियान संचालन गरिरहेका पालिकाहरूले विहान माइकिङमार्फत खोप लगाउनुपर्ने कारण र खोप लगाउन सकिने खोप केन्द्रहरुको जनाकारी दिने व्यवस्था मिलाएका छन् । नगरपालिका तथा गाउँपालिकाका मुख्य वासस्थान रहेका स्थानहरुमा माइकिङ गर्ने, स्थानीय सञ्चार माध्यमबाट सूचना दिने सम्मका काम गरिएको पालिकाहरूले जनाएका छन् ।
रुपन्देहीको तिलोत्तमा नगरपालिकाले दोस्रो पटक टोल अभियान चलाइरहेको छ । कोही पनि खोपबाट वञ्चित नहुन भन्ने उद्देश्यले कर्मचारी घरदैलोमा पठाएर खोपबारे पूर्ण जानकारी गराइरहेको नगरपालिकाका कोभिड–१९ फोकल पर्सन केशवराज भट्टराईले बताउँछन् । ‘हामी निरन्तर फिल्डमा छौँ । दोस्रो पटक पनि खोप अभियान संचालन गरेका छौँ,’ उनले भने, ‘मजदुर, र बिरामी मानिसहरु छुटेको देखिएको छ । उहाँहरुलाई पनि अनुकूलता अनुरुप खोप लगाउँछौँ ।’
रुपन्देहीको सैनामैना नगरपालिकाले कोभिडविरुद्धको पूर्ण खोप लगाउन सफल नगर घोषणा गर्न अहिले घरदैलो कार्यक्रम थालेको छ । टोलविकास संस्था, आमा समूह, क्लवहरुसँगको सहकार्यमा नगरभित्र खोप लगाउन छुटेकाहरुको लगत संकलन गर्ने र खोप लगाउने अभियान संचालन भैरहेको सैनामैनाका नगरप्रमुख चित्रबहादुर कार्की बताउँछन् । ‘हामी घर–घरमा पुगेर खोप लगाउनुपर्छ भन्ने प्रचार गर्दै घरदैलोमा पुग्ने गरी कार्य गरिरहेका छौँ,’ उनले हेल्थआवाजलाई भने घरदैलो गर्दा अधिकांशले खोप लगाइसकेको पाइएको छ ।
छुटेकाहरुलाई पनि हामी खोप लगाउँछौँ र पूर्ण खोपयुक्त नगर घोषणा गछौँ ।’ खोपका बारेमा जानकारी नपाएका र नगरबाहिर मजदुरी गर्न जानेले मात्र खोप नलगाएको पाएको उनको भनाइ छ ।
अर्घाखाँचीको भूमिकास्थान नगरपालिकाले पनि अभियान संचालन गरेको छ । ‘हामी खोप अभियान संचालन गरिरहेका छौँ,’ नगरप्रवत्ता बाबुराम सुनारले भने, ‘नगरभित्रका तोकिएका उमेर समूहका व्यक्तिहरुलाई खोप दिने काम चलिरहेको छ ।’
सार्वजनिक स्थान र कार्यालयमा खोप कार्ड अनिवार्य गरिएपछि पनि खोप केन्द्र खोज्दै आउनेहरूको पनि संख्या बढेको पालिकाहरुको बुझाइ छ । सोहीअनुरुप व्यवस्थापन समेत हुने गरेको छ ।
खोप अनिवार्य रुपमा लगाउनुपर्ने भएकाले र जनचेतनामा समेत वृद्धि भएकाले खोप कार्यक्रम प्रभावकारी देखिएको डा. नन्दु पाठक बताउँछन् । ‘खोपले जटिलता धेरै कम गरेको छ । अनिवार्य रुपमा खोप लगाउनुपर्छ । त्यही अभियानमा पालिकाहरु र प्रदेश सरकारसँगै संघीय सरकार पनि लागिरहेको छ । यो सकारात्मक कुरा हो,’ उनले भने ।
प्रदेश सरकारले स्वास्थ्य केन्द्रमार्फत पालिकासँग नै समन्वय गरी खोप अभियानलाई अघि बढाइरहेको प्रदेशको स्वास्थ्य, जनसंख्या तथा परिवार कल्याण मन्त्रालयका सचिव डा. विकास देवकोटा बताउँछन् ।
