नेपालगन्ज—नेपालगन्जको जमुनाहा नाकामा खटिएका २० जना स्वास्थ्यकर्मीमध्ये १० जनालाई कोभिड–१९ संक्रमण भएपछि सीमा नाकामा हुँदै आएको कोभिड परीक्षण कार्य प्रभावित भएको छ ।
ल्याब टेक्निसियनसहित १० जना स्वास्थ्यकर्मी संक्रमित भएका कारण जमुनाहा नाकामा गरिदैं आएको परीक्षणको संख्या आधा घटेको छ ।
२० जना जनशक्ति हुँदा दैनिक ७ सय ६६ जनासम्मको परीक्षण हुने गरेकोमा जनशक्ति कम भएका कारण पछिल्ला दिनहरुमा २ सयदेखि ३ सय जनासम्मको मात्रै परीक्षण हुने गरेको छ । पछिल्ला दिनहरुमा सीमा नाकामा एन्टिजेन चेकजाँच गर्दा करिब ७ प्रतिशतमा संक्रमण देखिने गरेको छ ।
जनशक्ति अभावका कारण परीक्षण प्रभावित भएपनि हालसम्म थप जनशक्तिको ब्यवस्थापन नभएको हेल्थ डेक्सका ल्याब टेक्निसियन चिरन्जीवी ज्ञवालीले बताए ।
पछिल्लो समय बाँकेमा कोभिड–१९ संक्रमितहरुको संख्या बढेसँगै अस्पतालहरुमा पनि संक्रमित बिरामीको चाप बढ्न थालेको छ । भेरी अस्पतालको आइसोलेसन वार्डमा १८ जना उपचाररत छन् ।
संक्रमितहरुको संख्या बढेसँगै नेपालगन्ज उप–महानगरपालिकाले नेपालगन्जमा ५० बेडको आइसोलेसन सेन्टर पुनः संचालन गरेको छ । नगरपालिकाको आइसोलेसन सेन्टरमा अक्सिजन र स्वास्थ्यकर्मीसहित संक्रमितहरुलाई बस्ने खाने व्यवस्था मिलाइएको नेपालगन्ज उप–महानगरपालिका स्वास्थ्य शाखाका प्रमुख रामबहादुर चन्दले बताए ।
