नेपालगन्ज—बाँकेमा कोभिड–१९ विरुद्धको खोपको पहिलो डोज लगाउनेको संख्या ५३ प्रतिशत पुगेको छ । ३६ प्रतिशतले दोस्रो डोज लगाएका छन् । बाँके जिल्ला पहिलो र दोस्रो कोभिड–१९ महामारीको लहरमा ‘हटस्पट’ बनेको थियो । भारतीय सीमा नाकासँग जोडिएका कारण बाँके कोभिड–१९ संक्रमणको उच्च जोखिममा छ ।
हालसम्म बाँकेमा १८ हजार ४ सय ६४ जना संक्रमित भइसकेका छन् । कोभिड संक्रमणकै कारण बाँकेमा ३ सय ४४ जनाको मृत्यु भइसकेको छ । संक्रमणको जोखिम उच्च भएकाले स्वास्थ्य मन्त्रालयले बाँकेमा प्राथमिकताका साथ कोभिड विरुद्धको खोप कार्यक्रम संचालन गर्दै आएको छ ।
बाँकेमा हालसम्म १ लाख ८८ हजार ४ सय ५१ जनाले पहिलो डोज लगाएका छन् भने पहिलो र दोस्रो दुवै डोज लगाउनेहरुको संख्या १ लाख २६ हजार ८ सय २० पुगेको छ । पहिलो डोज लगाएका ६१ हजार ६ सय ३१ जनाले खोपको दोस्रो डोज लगाउन बाँकी रहेको स्वास्थ्य कार्यालय बाँकेले जनाएको छ ।
बाँकेका ८ वटा स्थानीय तहमध्ये नेपालगन्ज उपमहानगरपालिकालगायत ६ वटा स्थानीय तहमा पहिलो डोज लगाउनेहरुको संख्या ५० प्रतिशतभन्दा माथि भएपनि कोभिड–१९ संक्रमणको हटस्पट बनेको नरैनापुरमा भने खोप लगाउनेको संख्या निक्कै कम छ ।
नरैनापुरमा पहिलो डोज खोप लगाउनेको संख्या २७ प्रतिशत र दोस्रो डोज १६ प्रतिशत मात्रै छ । खोपको कभरेज कम भएका क्षेत्रलाई फोकस गरेर सचेतनामूलक कार्यक्रम संचालन गरेर खोपको कभरेज बढाउने प्रयास भइरहेको स्वास्थ्य कार्यालय बाँकेले जनाएको छ ।
लुम्बिनी प्रदेशका १२ वटा जिल्लामध्ये बढी खोप लगाउनेमा जिल्लाहरुमा बाँके तेस्रो स्थानमा छ । स्वास्थ्य मन्त्रालयले देशैभर कोभिड–१९ विरुद्धको खोपको कभरेज ६६ प्रतिशत पु¥याउने लक्ष्य राखेको छ ।
पछिल्ला दिनहरुमा कोभिड–१९ विरुद्धको खोप आउने क्रम बढ्दै गएका कारण स्वास्थ्य कार्यालय बाँकेले खोप लगाउन मिल्ने सबै उमेर समूहका मानिसहरुलाई एउटै खोप केन्द्रबाट एकै पटक पहिलो र दोस्रो डोज खोप लगाउने तयारी गरिरहेको छ ।
भारतमा पहिलो डोज खोप लगाएर नेपाल फर्कदै गरेका नेपाली नागरिकहरुलाई उनीहरुले भारतमै लगाएको खोपकै दोस्रो डोज लगाउने ब्यवस्था मिलाइने स्वास्थ्य कार्यालय बाँकेका खोप अधिकृत नरेश श्रेष्ठले बताए ।
भारतमा कोभिशिल्ड खोप पहिलो डोज लगाएका नेपालीहरुले नेपालमा कोभिशिल्ड खोपको अभाव भएका कारण नेपालमा कोभिशिल्ड खोपको दोस्रो डोज लगाउन पाएका छैनन् ।
नेपालका कोभिशिल्ड खोप पनि आउन सुरु गरेका कारण सबैलाई सहज हुने गरी खोप लगाएर खोपको कभरेज बढाउने लक्ष्यका साथ स्वास्थ्य कार्यालय बाकेले काम गरि खोप अधिकृत श्रेष्ठले जानकारी दिए ।
