नेपालगन्ज— नेपालगन्जको जमुनाहा नाकामा एन्टिजेन परीक्षण गर्दा कोभिड-१९ पोजेटिभ आएका व्यक्तिहरु पनि सिधै सार्वजनिक बस चडेर आ—आफ्नो घर जाने गरेका छन् । चाडपर्व मनाउन भारतबाट विभिन्न सहरबाट घर फर्कदै गरेकाहरुलाई सीमा नाकामा घण्टौसम्म पर्खाएर एन्टिजेन परीक्षण गरिन्छ । परीक्षण गर्दा पोजेटिभ रिपोर्ट आएका ब्यक्तिहरुलाई कहाँ पठाउने ठाउको ब्यवस्था छैन ।
कोभिड—१९ संक्रमण भएका तर स्वास्थ्य अवस्था सामान्य भएकाहरुलाई राख्ने आइसोलेसन सेन्टरको ब्यवस्था नेपालगन्ज उपमहानगरपालिकाले गर्ने र बिरामीहरुको उपचार भेरी अस्पतालले गर्नुपर्ने हो । तर, पछिल्ला दिनहरुमा स्वास्थ्य अबस्था सामान्य भएका संक्रमितहरु आइसोलेसन सेन्टर र अस्पतालमा बस्न नमान्ने समस्या छ ।
आइसोलेसन सेन्टर र अस्पतालमा बसेर उपचार गराउन चाहनेहरुका लागि पनि नेपालगन्जमा अहिले आइसोलेसन सेन्टरको ब्यबस्था छैन । भेरी अस्पतालले पनि स्वास्थ्य अवस्था सामान्य भएका संक्रमितहरुलाई भर्ना गर्दैन ।
संक्रमितलाई राख्ने ब्यवस्था नभएका कारण हेल्थ डेक्सका स्वास्थ्यकर्मीहरुले संक्रमितहरुलाई सम्झाई बुझाई गरेर डबल मास्क लगाएर सिधै घर पठाउने गरेका छन् । पोजेटिभ रिपोर्ट आएका संक्रमितहरु पनि ब्यक्ति अन्य ब्यक्तिसँग सार्वजनिक बस चडेर घर जाने गरेका छन् ।
कोभिड—१९ पोजेटिभ भएका ब्यक्ति सार्वजनिक बस चढेर यात्रा गर्दा अन्य यात्रुहरुमा संक्रमण हुने जोखिम अत्याधिक हुन्छ । तर, स्वास्थ्य कार्यालय, नेपालगन्ज उप—महानगरपालिका र जिल्ला प्रशासन कार्यालय बाँके मात्रै नभएर स्वास्थ्य मन्त्रालयको चरम लापरवाहीका कारण १० भदौदेखि दैनिक १ देखि ३ जनासम्म कोभिड—१९ संक्रमित सार्वजनिक बसमा यात्रा गरेर आ आफ्नो घर गइरहेका छन् ।
१० भदौदेखि २५ असोजसम्म ६५ जना संक्रमित सार्वजनिक बस चढेर बाँके, बर्दिया, सुर्खेत दैलेखदेखि दाङ र सल्यानसम्म पुगेका छन् ।
संक्रमितहरुलाई अस्पताल वा आइसोलेसन सेन्टरमा राखेर उपचारको ब्यवस्था मिलाई दिन स्वास्थ्य कार्यालय बाँके, नेपालगन्ज उपमहानगरपालिका र जिल्ला प्रशासन कार्यालय बाँकेलाई पटक—पटक अनुरोध गर्दा पनि सुनुवाई नभएको डेस्क जमुनाहा नाका ल्याब टेक्निसियन चिरन्जीवी ज्ञवालीले बताए ।
कोभिड—१९ संक्रमण बढ्दै गएपछि २०७८ बैशाखदेखि भारतबाट नेपालगन्ज नाका हुँदै नेपाल फर्कने नेपालीहरुलाई सीमा नाकामा रोकेर कोभिड संक्रमण भए नभएको एकीन गर्नका लागि एन्टिजेन परीक्षण गर्न थालिएको हो ।
पछिल्ला दिनहरुमा सीमा नाकामा दैनिक करिब ३ सय जनाको एन्टिजेन परिक्षण हुने गरेको छ । सोमबार २ सय ७२ जनाको परीक्षण गर्दा १ जनामा कोभिड संक्रमण देखिएको छ ।
सीमा नाकामा गरिने एन्टिजेन परीक्षणको रिपोर्ट पाउनका लागि एउटा यात्रुले २ देखि ३ घन्टासम्म पर्खनुपर्छ । चाडपर्वको सिजन सुरु भएकाले पछिल्ला दिनहरुमा नेपाल फर्कनेहरुको भिड बढ्दै गएको छ । बिहान ६ बजेदेखि नै सिमा नाकामा घर फर्किनेहरुको भिड हुन्छ ।
सीमा नाकामा खटिएका सुरक्षाकर्मी र स्वास्थ्यकर्मीहरुले घर फर्किदै गरेका नेपालीहरुलाई रोकेर चेकजाँच गर्छन् । धेरै भिडभाड हुन थालेपछि सोधपुछ गरेर १० जनामध्ये २÷३ जनाको परीक्षण गर्ने र अन्य ब्यक्तिलाई रिपोर्ट नआउदासम्म पर्खाएर राखिन्छ ।
भारतबाट लामो यात्रा गरेर नेपाल फर्किएकाहरु सीमा नाकामा कोभिड चेकजाँचका लागि घण्टौसम्म अव्यवस्थित रुपले भिडभाडमा बस्न विवश छन् ।
रिपोर्ट नेगेटिभ आए समूहमा रहेका सबैलाई तत्कालै घर जान दिन्छ भने रिपोर्ट पोजेटिभ आए त्यो समूहमा रहेका सबैको एन्टिजेन टेष्ट गरिन्छ । घण्टौ पर्खाएर एन्टिजेन टेष्ट गर्ने तर पोजेटिभ रिपोर्ट आएपनि सार्वजनिक बस चडेर सिधै घर पठाउने गरिएपनि जिल्ला प्रशासन र नेपालगन्ज उप महानगरपालिका रमिते बनेका छन् ।
सीमा नाका भएर लुम्बिनी कर्णाली र सुदूरपश्चिम प्रदेशका हजारौ मानिसहरु नेपाल फर्कन्छन् । ती सबै मानिसमध्ये संत्र,मितहरुलाई सँगै राखेर बस्ने खाने र उपचार गर्ने ब्यवस्था उपमहानगरपालिकाले सधै गर्न नसक्ने अवस्था भएकाले संघीय र प्रदेश सरकारदले त्यसका लागि छुट्टै व्यवस्थापन गर्न आबश्यक भएको नेपालगन्ज उपमहमनरपालिकाकी उपमेयर उमा थापाले बताइन् ।
कोभिड—१९ संक्रमण सुरु भएदेखि २५ असोजसम्म जमुनाहा हेल्थ डेक्समा ३६ हजार ९ सय २६ जनाको एन्टिजेन टेष्ट गरिएको छ । टेष्ट गरिएका मध्ये ३ सय ८८ जनामा कोभिड संक्रमण देखिएको छ ।
