बुटवल—लुम्बिनी प्रदेशको कपिलवस्तु जिल्लाको कृष्णनगर नगरपालिकामा हैजाको लक्षणसँग मिल्दो जुल्दो महामारी फैलिएको छ । जसका कारण बिरामीको संख्या २ सय ४० नाघेको जिल्ला स्वास्थ्य कार्यालय कपिलवस्तुका प्रमुख हेमराज पाण्डेले बताए ।
उनका अनुसार नगरपालिका भित्र बिरामीको संख्या बढ्ने क्रममा छ । अस्पतालमा भर्ना भएकामध्ये ३५ जनालाई थप उपचारका लागि प्रादेशिक अस्पताल बुटवल र तौलिहवा अस्पतालमा पठाइएको उनले बताए ।
रोगको पुष्टिका लागि बिरामीको दिसाको नमुना संकलन गरी ल्याबमा पठाइएको उनले बताए । ‘हामी नमूना संकलन गरेर ल्यावमा पढाएका छौँ । नतिजा नआउन्जेल केही भन्न सक्ने अवस्था छैन्,’ उनले भने, ‘सामान्य लक्षण हेर्दा हैजा जस्तै छ । नमुनाको नतिजा आउन कम्तीमा ४८ घण्टा लाग्छ । रिपोर्ट आएपछि सबै कुरा थाहा हुन्छ ।’
बिरामीलाई निरन्तर झाडाबान्ता हुने र निकै कमजोर बनाउने गरेको छ । बिरामी थपिदै जान थालेपछि शिवराज अस्पताल बहादुरगन्जमा एउटै बेडमा तीनजना राखेर उपचार सुरु गरिएको छ । ‘बिरामीहरू बढ्दै गएका छन्,’ शिवराज अस्पतालका चिकित्सक मुकेश चौधरीले भने, ‘उपचार गर्न समेत धौ—धौ भएको छ । एउटै बेडमा धेरै बिरामी राख्न बाध्य भएका छौँ ।’
यसअघि जिल्ला स्वास्थ्य कार्यालय कपिलवस्तु, प्रदेश स्वास्थ्य निर्देशनालयको अनुगमन टोलीले अनुगमन समेत गरेको थियो ।
कृष्णनगर नगरपालिकाको वडा नं ७, ८ र ९ का सुखरामपुर, जमुनी, देवानगडिया, बहादुरगञ्ज, गणेशपुर, डावरालगायतका बस्तीमा रोग फैलिएको छ । प्रभावित क्षेत्रमा विरामीहरु आफूलाई पायक पर्ने ठाउँमा उपचार गराउँदै आएका छन् । पालिकाका निजी क्लिनिकमा समेत विरामी भर्ना गरी उपचार गराउँदै आएका छन् ।
यसैगरी शिवराज अस्पतालमा बिरामीको चाप बढेपछि अस्पतालको गल्ली, बरन्डा र रोग नियन्त्रणमा आएका बिरामीलाई अस्पताल नजिक रहेको राम गोरखा माविमा उपचार गरिएको छ । पालिका भरी रोग प्रभावितको संख्या एकीन हुन सकेको छैन् ।
दुई जनाको मृत्यु
रोग फैलिँदा नगरपालिकाको वडा नं ८ बहादुरगञ्जका दुई जनाको मृत्यु भएको छ । स्थानीय ४५ वर्षका रामप्रसाद केवट र ८ वर्षका राज कश्यपको मृत्यु भएको छ ।
उपचार गर्न अस्पताल नआएका कारण उनीहरुको मृत्यु भएको बताइएको छ । उनीहरुसँग उपचार खर्चसमेत नरहेको स्थानीयले बताएका छन् ।
