बुटवल— पाल्पामा अक्सिजन प्लान्ट राख्ने भवन नहुँदा झन्डै दुई महिनादेखि थन्किएको प्लान्टबाट अक्सिजन उत्पादन सुरु भएको छ । प्लान्ट राख्ने भवन बनाउन रकम नहुँदा दुई महिनादेखि जडान हुन नसकेको प्लान्ट भवन तयार भएपछि जडान गरी उत्पादन सुरु भएको हो ।
कोभिड—१९ महामारीमा अक्सिजनको समस्या देखिएको पाल्पा जिल्लामा अक्सिजन प्लान्टबाटै अक्सिजन उत्पादन सुरु भएको छ । जिल्ला अस्पताल तानसेनमा जडान भएको अक्सिजन प्लान्टबाट ४ सय २० लिटर प्रतिमिनेट उत्पादन सुरु भएको हो । प्रेसर स्विङ एडजप्सन (पीएसए) विधिको प्लान्टबाट उत्पादित अक्सिजनले एक दिनमा ४० लिटर क्षमताका ५० वटा सिलिन्डर भर्न सकिने इलेक्ट्रीकल इन्जिनियर देवेन्द्र श्रेष्ठले बताए । ‘उत्पादनको मात्रा ठूलो हो । तत्काल आवश्यक अक्सिजनको आपूर्तिमा सहज हुने विश्वास लिएका छौं,’ उनले भने ।
पीएसए विधिको प्लान्ट शुद्ध अक्सिजन उत्पादन गर्ने प्राविधिकहरु बताउँछन् । उत्पादित अक्सिजन कति शुद्ध छ भन्ने विषयसमेत महत्वपूर्ण हुने गर्दछ । प्लान्टबाट उत्पादित अक्सिजन ९३ प्रतिशतसम्म शुद्ध हुने उनले श्रेष्ठले बताए ।
पाल्पामा अक्सिजन उत्पादन सुरु भएसँगै पाल्पा अस्पताल र स्थानीय तहमा अक्सिजन अभावको समस्या समाधान हुने पाल्पा अस्पतालका निमित्त मेडिकल सुपरिटेन्डेन्ट डा. जगदीश कुँवरले बताए । प्लान्टबाट पाइपलाइन बिच्छ्याएर बेडमा अक्सिजन लैजान सकिने र छुट्टै सिलिन्डर भरेर पनि दिन सकिने उनको भनाइ छ ।
सरकारले ४ जेठमा अक्सिजन प्लान्ट जडानका लागि १ करोड ५० लाख रुपैयाँ बजेट स्वीकृत गरेको थियो । अक्सिजन प्लान्टको भने असारमै टेन्डर भएर आएको हो ।
