नेपालगन्ज–नेपालगन्जको भेरी अस्पतालमा स्वास्थ्यकर्मीमाथि आक्रमण र हातपात भएको घटनाको छानविन गर्न गठित समितिले आक्रमणको घटनामा संलग्नहरुलाई ज्यान मार्ने उद्योग अभियोगमा कारबाहीका लागि सिफारिस गरेको छ ।
बाँकेका सहायक प्रमुख जिल्ला अधिकारी शंकर बिष्टको संयोजकत्वमा गठित ७ सदस्सीय छानविन समितिले घटनामा संलग्नहरुलाई ज्यान मार्ने उद्योगको अभियोगमा कारवाहीका लागि सिफारिस गरेको छानबिन समितिका सदस्य एवं नर्सिङ संघ बाँकेकी अध्यक्ष लक्ष्मी केसीले बताइन् ।
छानविन समितिले घटनाको स्थलगत अध्ययन, संलग्न ब्यक्तिहरुसँग सोधपुछ , घटनास्थलको सिसिटिभी फुटेजलगायत अन्य सरोकारवाला ब्यक्तिहरुसँगको छलफलपछि प्रतिबेदन तयार पारेर बाँकेका प्रमुख जिल्ला अधिकारी शिवराम गेलाललाई बुझाएको हो ।
समितिलाई घटनाको बारेमा विस्तृत अध्ययन गरी के कति कारणले घटना घट्यो दोषीहरु को को हुन र आगामी दिनमा यस्ता घटना दोहोरिन नदिन के कस्तो सावधानी अपनाउनुपर्छ भन्ने प्रतिवेदन तयार पारी पेश गर्ने अख्तियारी दिइएको थियो ।
छानविन समितिले प्रतिवेदन बुझाएको र अध्ययनकै क्रममा रहेको बाँकेका प्रमुख जिल्ला अधिकारी गेलालले बताए ।
भेरी अस्पतालका चिकित्सक र स्टाफ नर्सहरुले ड्युटीमा रहेका बेला बिरामी आफन्तको मृत्यु भएपछि दाङ तुल्सीपुरका मानबहादुर रावत, भरत रावत र लोकराज रावतले आक्रमण गरेको घटनाका पीडित स्वास्थ्यकर्मीहरुको जाहेरीका आधारमा बाँके प्रहरीले तीनै जना अभियुक्तहरुलाई पक्राउ गरी ज्यान मार्ने उद्योगमा मुद्दा दायर गरेर अनुसन्धान गरिरहेको छ ।
भेरी अस्पतालका स्टाफ नर्स सदीक्षा गैरे, अस्विनी गुरुङ, रीता भण्डारी, भावना श्रेष्ठ, कविता पुन, चिकित्सक चन्द्र प्रकाश साहु, दीपक गुप्ता र समा अन्सारी माथि जेठ १३ गते राति आक्रमण भएको थियो ।
