नेपालगन्ज–नेपालगन्जका चिकित्सक र नर्सहरुले ड्युटीमा रहेका स्वास्थ्यकर्मीमाथि आक्रमण र हातपात गर्नेहरुलाई ‘जेल विथ आउट वेल’ अर्थात धरौटीमा नछाडेर जेल मै राखेर कारबाही गर्ने कानुनी ब्यवस्था लागु गर्न माग गर्दै प्रदर्शन गरेका छन् ।
स्वास्थ्यकर्मीहरुमाथि आक्रमण भएपछि आन्दोलनमा उत्रने स्वास्थ्यकर्मीहरुलाई थामथुम पार्नका लागि अस्पतालहरुमा २-४ दिन सुरक्षाकर्मीहरु बढाएर मात्रै नहुने बताउँदै उनीहरुले ‘जेल विथ आउट वेल’को प्रावधानसहितको कडा कानुन जारी हुनुपर्ने बताएका छन् ।
स्वास्थ्यकर्मीको सुरक्षाको लागि स्वास्थ्यकर्मी तथा स्वास्थ्य संस्थाको सुरक्षा सम्बन्धी ऐन–२०६६ छ । तर, उक्त ऐनमा स्वास्थ्यकर्मी अथवा स्वास्थ्य संस्थामा हातपात, तालाबन्दी तथा तोडफोडजस्ता कार्य गर्न नहुने उल्लेख छ ।
उक्त कानुन प्रभावकारी नभएका कारण स्वास्थ्यकर्मीमाथि आक्रमण र हातपात गर्नेमाथि कहिल्यै पनि कडा कारवाही नभएको गुनासो स्वास्थ्यकर्मीहरुको छ ।
गत २४ बैशाखमा भेरी अस्पतालको इमर्जेन्सी वार्डमा कार्यरत हेल्थ असिसटेन्ट पुपेन्द्र शाही माथि ३/४ जना अपरिचित व्यक्तिले हातपात गरे । हातपातको घटनापछि अस्पतालका प्रमुख डा. प्रकाश थापा र अध्यक्ष प्रमोद घितालद्धारा विज्ञप्ती जारी गरी दोषी माथि कारबाही र सुरक्षाको माग गरे । तर, दोषी माथि कुनै कारवाही नभएको हेल्थ असिस्टेन्ट पुपेन्द्र शाहीले बताए ।
२०७७ भदौ १९ गते सामाजिक अभियान्ता ज्ञानेन्द्र शाहीसँगै भेरी अस्पतालमा पुगेका युवाहरुद्धारा अस्पतालका फिजिसियन डा. विपिन आचार्य र स्टाफ नर्समाथि हातपात गर्दै दुर्व्यवहार भयो ।
स्वास्थ्यकर्मी माथि हातपात र दुर्व्यवहार गर्न खोज्ने एक जना युवालाई अस्पतालका स्वास्थ्यकर्मीले नियन्त्ररणमा लिएर कारबाहीका लागि प्रहरीलाई बुझाए पनि कारबाही नभएको गुनासो डा. आचार्यको छ ।
सरकारले अध्यादेशमार्फत ‘जेल विथ आउट वेल’को व्यवस्था भएको कानुन ल्याएर स्वास्थ्यकर्मीहरुलाई भयरहित रुपमा काम गर्ने वातावरण सिर्जना गर्नुपर्ने नर्सिङ संघ बाँकेकी अध्यक्ष लक्ष्मी केसीले बताइन् ।
‘जेल विथ आउट बेल’को व्यवस्थासहितको कानुनको माग गर्दै पहिलो चरणमा एक सातासम्म हरेक दिन साँझ साढे ५ देखि साढे ६ बजेसम्म शान्तिपूर्ण धर्ना दिने र सुनुवाई नभए एक सातापछि थप कडा आन्दोलन गर्ने चिकित्सक संघ भेरीका अध्यक्ष डा. विनोद कर्णले बताए ।
