बुटवल– रुपन्देहीको तिलोत्तमा नगरपालिकाले कोरोना भाइरस संक्रमितहरुलाई आयुर्वेदिक औषधि वितरण सुरु गरेको छ । शंकरनगरस्थित आइसोलेसन सेन्टर र घरमै आइसोलेसनमा बसेका कोरोना संक्रमितहरुलाई रोग प्रतिरोधात्मक क्षमता बढाउने औषधि वितरण गरिएको हो ।
नगर प्रमुख वासुदेव घिमिरे, उपप्रमुख जगेश्वरदेवी चौधरीको उपस्थितिमा शुक्रबार बिहान आइसोलेसन सेन्टरमा रहेकाहरुलाई औषधि वितरण गरिएको छ ।
घरमा आइसोलेसनमा बसेकाहरुलाई सम्बन्धित वडाका जनप्रतिनिधिमार्फत् घरमै पुगेर आयुर्वेदिक औषधि वितरण गरिने नगरपालिकाका सिनियर अहेव अधिकृत गणेश गौतमले जानकारी दिए ।
तिलोत्तमा नगरपालिकामा हालसम्म संक्रमितको संख्या ९९ पुगेको छ । जसमध्ये ५३ जना आइसोलेसनबाट निको भएर घर फर्किसकेका छन् । हाल आइसोलेसनमा ४६ जना मात्र छन् ।
नगरपालिकाले रोग प्रतिरोधात्मक क्षमता बढाउनका लागि आयुर्वेद तथा वैकल्पिक चिकित्सा विभाग काठमाडौँबाट तयार पारिएको प्रोटोकलअनुसार औषधि प्रयोगमा ल्याएको छ । गुर्जो, अश्वगन्धा चूर्ण, तुलसी चिया, च्वानप्रास लगायतका आयुर्वेदिक औषधिले रोग प्रतिरोधात्मक क्षमता बढाउने भएकाले यी औषधि प्रयोग गर्न प्रोत्साहन गर्ने गरी वितरण गरिएको करहिया आयुर्वेदिक औषधालयका इञ्चार्ज प्रकाश ज्ञवालीले बताए ।
कोरोना भाइरस सङ्क्रमण पुष्टि भई लक्षण नदेखिएका वा सामान्य लक्षण देखिएकालाई मनोसामाजिक परामर्शका साथै रोग प्रतिरोधात्मक क्षमता बढाउने आहार–विहार तथा स्थानीयस्तरमा उपलब्ध जुडीबुटीबाट निर्मित औषधिको सेवनमा प्रोत्साहित गरिएको उनले बताए ।
